Haki Rugova thotë se Avdullah Hoti ishte prezent kur ndodhi incidenti në Kuvendin e LDK-së në Mitrovicë

Nënkryetari i Lidhjes Demokratike të Kosovës, Haki Rugova, njëherësh kryetar i Komunës së Istogut, ka folur në lidhje me përleshjen fizike që ka ndodhur gjatë Kuvendit Zgjedhor në Degën e LDK-së në Mitrovicë.

Rugova e quajti “bërllok” rrahjen ndërmjet delegatëve.

“Nëse ata e kanë bë bërllok atje, pikërisht edhe këto fjalë të bërlloku nuk bën me i fol. I keni pa qëndrimet që i kanë marr aty kryesia e LDK-së. Ato janë për ato zgjedhje. Janë pezulluar definitivisht dhe do të vazhdojmë me klimë më të volitshme më të mirë… Qëndrimi zyrtar i LDK- së është ky: nuk tolerojnë këto. Janë anuluar zgjedhjet aty. E ka anuluar dega e Mitrovicës në përkrahje edhe të kryesisë së LDK-së”, tha Rugova, për Ekonomia Online.

E kur u pyet nëse ka qenë i pranishëm në atë tubim Avdullh Hoti, nënkryetari i LDK-së, Rugova tha se Hoti ishte aty kur ndodhi përleshja ndërmjet delegatëve.

“Ishte zotri Hoti aty, në një pikë në një nëndegë ku ka ndodhur ai eksesi. Dhe ai ekses do të kalohet gjithsesi”, tha Rugova.

Përleshja gjatë Kuvendit Zgjedhor në Degën e LDK-së në Mitrovicë ka ndodhur si shkak i pakënaqësive ndërmjet delegatëve të kësaj dege, për shkak të zgjedhjes së kryetarit të ri.