Gratë transgjinore në SHBA, dënimin do ta vuajnë në burgjet e burrave

Gratë transgjinore do të vuajnë dënimet e tyre në burgjet e burrave, një vendim i cili ka shkaktuar reagime të forta nga aktivistët për të drejtat e njeriut dhe mbrojtësit e komunitetit LGBTI+.

Ky hap erdhi pas një serie masash të tjera që kanë ngushtuar mundësitë për individët transgjinorë në SHBA.

Pritet që ky vendim të sjellë pasoja të rënda, duke përfshirë ndarjen dhe diskriminimin që këto gra mund të përjetojnë në burgje, ku ato do të përballen me kushte të papërshtatshme dhe rrezikshmëri të lartë, përfshirë dhunën dhe abuzimin.

Po ashtu, shërbimet mjekësore të lidhura me tranzicionin gjinor, të cilat përfshinin trajtimin hormonor dhe ndërhyrjet kirurgjikale, nuk do të jenë më të disponueshme në institucionet korrektuese, shkruan newyorktimes.

Kjo masë e re ka shkaktuar shqetësim të madh te individët transgjinorë dhe mbështetësit e shëndetit mendor, të cilët argumentojnë se kjo do të përkeqësojë shëndetin dhe mirëqenien e këtyre individëve, duke i lënë ata pa mundësi për trajtim të nevojshëm gjatë periudhës së dënimit.

Më herët, presidenti amerikan, Donald Trump, njoftoi se SHBA-të do të njohë zyrtarisht vetëm dy gjini – mashkull dhe grua, duke bërë një kthesë të rëndësishme në politikën e vendit për çështjet gjinore. Ky njoftim ka pasur një ndikim të gjerë, duke përfshirë mundësinë për të kufizuar të drejtat dhe mundësitë për individët që nuk përputhen me normat tradicionale të gjinive.

Dje u bë gjithashtu e ditur se Departamenti i Shtetit i SHBA ka ndaluar përpunimin e aplikacioneve për ndryshime gjinore në pasaporta dhe ka ndaluar lëshimin e pasaportave me shenjën gjinore “X”, e cila ishte një mundësi për ata që nuk identifikohen si mashkull apo femër.

Ky vendim ka ngjallur shqetësime për të drejtat e individëve transgjinorë dhe non-binari, të cilët tani përballen me një realitet më të vështirë për të identifikuar veten dhe për të pasur dokumente të cilat pasqyrojnë realitetin e tyre gjinor. /Telegrafi/