Gjykimi i ish-krerëve të UÇK-së, vendimi mbi informacionin konfidencial dhe kontaktin me dëshmitarë, për 10 çështje lejohet ankesa, refuzohet për 18

Gjykatësi i procedurës paraprake, Nicolas Guillou, ka miratuar kërkesën për të apeluar vendimin mbi informacionin konfidencial dhe kontaktin me dëshmitarë për 10 çështje, ndërkaq ka refuzuar animimin për 18 çështje të tjera të parashtruara nga mbrojtja, në rastin e Hashim Thaçit, Kadri Veselit, Jakup Krasniqit e Rexhep Selimit.

Mbrojtja e Thaçit kishte kërkuar leje për ta apeluar këtë vendim për 15 çështje, ajo e Selimit për katër, duke vazhduar me atë të Krasniqit për gjashtë e atë të Veselit për tre çështje.

Ndërkaq, gjykata ka dhënë leje për ankesë për  çështjen e parë, të dytë, të katërt dhe të tetë të Thaçit, çështjen e parë dhe të katërt të Selimit, çështjen e tretë, të pestë dhe të gjashtë të Krasniqit dhe çështjen e parë të Veselit.

Kurse, ka refuzuar lejen për ankesë për çështjen e të tretë, të pestë, të gjashtë, të shtatë, të nëntë, të dhjetë, të njëmbëdhjetë, të dymbëdhjetë, të trembëdhjetë, të katërmbëdhjetë dhe të pesëmbëdhjetë të Thaçit, çështjen e dytë dhe të tretë të Selimit, çështjen e parë, të dytë dhe të katërt të Krasniqit dhe çështjen e dytë e tretë të Veselit, raporton “Betimi për Drejtësi“.

Vendimin e plotë e gjeni këtu: https://repository.scp-ks.org/LW/Published/Filing/0b1ec6e980ce0a1a/Decision%20on%20Defence%20Requests%20for%20Leave%20to%20Appeal%20Decision%20F00854.pdf

Ndryshe, më 29 prill, Zyra e Prokurorit  të Specializuar ka dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.

Prokuroria po pretendon se katër të akuzuarit kanë kryer krime lufte edhe në Gjilan, Budakovë e Semetishtë.

Në aneksin e publikuar sa i përket krimeve që pretendohen se ndodhën në Semetishtë dhe Budakovë, prokuroria ka listuar krimet e luftës si arrestimi dhe ndalimi i paligjshëm ose arbitrar, trajtim mizor ose çnjerëzor, torturë, vrasje. Ndërkaq, si krime kundër njerëzimit i ka listuar burgimin, vepra të tjera çnjerëzore, torturën, vrasjen, zhdukjen e personave me forcë dhe persekutimin.

Kurse, për krimet që pretendon që ndodhën në Gjilan, si krime lufte i ka listuar arrestimi dhe ndalimin e paligjshëm ose arbitrar, trajtimin mizor ose çnjerëzor, torturën dhe  vrasjen. Ndërsa, si krime kundër njerëzimit ka listuar burgimin, vepra të tjera çnjerëzore, torturën, vrasjen dhe persekutimin.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë.

Njëjtë është deklaruar edhe Veseli në paraqitjen e tij më 10 nëntor, sikurse edhe Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.

Sipas akuzës, së paku midis marsit 1998 deri në shtator 1999, Hashim Thaçi, Kadri Veseli, Rexhep Selimi, Jakup Krasniqi dhe anëtarë të tjerë të ndërmarrjes kriminale të përbashkët kishin qëllimin e përbashkët për të siguruar dhe ushtruar kontroll mbi të gjithë Kosovën përmes metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë.

“Ndër këta kundërshtarë përfshiheshin persona që ishin, ose që konsideroheshin se kishin qenë: (a) bashkëpunëtorë ose të lidhur me forca, zyrtarë ose institucione shtetërore të RFJ-së, ose që (b) ndryshe nuk mbështetnin qëllimet ose metodat e UÇK-së dhe më vonë të QPK-së, ndër të cilët persona të lidhur me LDK-në dhe serbë, romë dhe persona të kombësive të tjera (bashkërisht, ‘kundërshtarët’). Ky qëllim i përbashkët përfshinte krimet e përndjekjes, burgosjes, arrestimit dhe ndalimit arbitrar ose të paligjshëm, akte të tjera çnjerëzore, trajtimin mizor, torturën, vrasjen dhe zhdukjen me forcë të personave”, thuhet në aktakuzë.

Tutje, në aktakuzë përmenden edhe Azem Syla, Lahi Brahimaj, Fatmir Limaj, Sylejman Selimi, Rrustem Mustafa, Shukri Buja, Latif Gashi dhe Sabit Geci.

Sipas aktakuzës, të akuzuarit bashkë me udhëheqësit tjerë të UÇK-së kontribuuan në arritjen e qëllimit të përbashkët.

“Si alternativë, disa ose të gjithë këta individë nuk ishin anëtarë të ndërmarrjes kriminale të përbashkët, por u përdorën nga anëtarë të ndërmarrjes kriminale të përbashkët për të kryer krime për realizimin e qëllimit të përbashkët (së bashku me anëtarët e NKP-së, bashkërisht ‘anëtarët dhe instrumentet e NKP-së’)”, thotë akti akuzues.