Gjiganti gjerman Bosch sheh rënie të shitjeve, paralajmëron shkurtime të mundshme të vendeve të punës

Shkurtimet e mëtejshme të vendeve të punës në gjigantin gjerman të teknologjisë Bosch nuk mund të përjashtohen në mes të betejave më të gjera ekonomike të vendit, ka thënë shefi ekzekutiv Stefan Hartung.

“Bosch nuk do t’i arrijë objektivat e tij në 2024”, citohet të ketë thënë Hartung për edicionin e së enjtes të gazetës Tagesspiegel, duke shtuar se ai nuk mund të konfirmojë nëse planet për të shkurtuar 7,000 vende pune në Gjermani do të vazhdojnë.

“Për momentin nuk mund ta përjashtoj mundësinë që do të na duhet të rregullojmë më tej kapacitetet tona të personelit”, tha ai.

Shitjet pritet të bien pak më poshtë se rezultatet e vitit të kaluar, tha Hartung, duke rishikuar parashikimet e mëparshme të rritjes.

Bosch – një furnizues kryesor i industrisë së automobilave – gjeneroi pothuajse 92 miliardë euro (100 miliardë dollarë) në vitin 2023.

Marzhi i fitimit operativ vlerësohet të bjerë në 4%, shtoi shefi ekzekutiv, nga 5% një vit më parë. Hartung tha se kompania synon të arrijë 7% deri në vitin 2026.

Komentet erdhën mes një viti të vështirë për Bosch, i cili ka zbuluar planet për të shkurtuar 7,000 vende pune në mbarë botën.

Shumica e vendeve të prekura besohet të jenë në Gjermani, në sektorin e furnizimit me automobila, mjetet dhe pajisjet shtëpiake të kompanisë.

Në fillim të këtij viti, Bosch u përball me protesta në të gjithë Gjermaninë nga rreth 25,000 punonjës në sektorin e furnizimit të automobilave mbi planet për të reduktuar orët kolektive të punës nga 40 në 35 orë. /Telegrafi/