Gjashtë deputetë të LDK-së nuk morën pjesë në seancë kur u votua Qeveria Kurti 2

Albin Kurti është zgjedhur për herë të dytë kryeministër i Kosovës.

Lideri i Lëvizjes Vetëvendosje ka marrë besimin e 67 deputetëve të Kuvendit, ndërsa kundër kanë votuar 30 deputetë.

Pjesa tjetër e deputetëve nuk kanë marrë pjesë në votim.

Ndër deputetët që nuk morën pjesë në votimin e Qeverisë Kurti ishin edhe një pjesë e atyre të LDK-së.

Avdullah Hoti, Armend Zemaj, Behgjet Pacolli, Agim Veliu, Driton Selmanaj e Vlora Dumoshi nuk kanë qenë fare të pranishëm në sallë kur është votuar Qeveria Kurti 2.

Mos prezenca e tyre në momentin e votimit dëshmohet me pamje filmike që janë transmetuar direkt me media.

Në një fotografi të shkrepur nga reporteri i Telegrafit, në momentin kur janë votuar nënkryetarët e Kuvendit vërehet prezenca e Agim Veliut, Driton Selmanajt dhe Vlora Dumoshit në sallë por që të njëjtit nuk ishin aty kur u votua qeveria.

Kujtojmë Besian Mustafa, Agim Veliu e Vlora Dumoshi kanë dhënë dorëheqje nga postet ministrore pak para seancës derisa, Avdullah Hoti dhe Armend Zemaj kanë vazhduar detyrat qeveritare edhe në momentin që është mbajtur seanca konstituive e Kuvendit duke mos u betuar si deputet dhe duke mos marrë pjesë në seancë.

Në momentin e votimit të Qeverisë Kurti në Kuvend ishin të pranishëm 9 deputetë të LDK-së./Telegrafi/