Ministri në detyrë i Sportit dhe kandidati për deputetë nga PDK-ja, Kujtim Gashi ka mohuar që Kadri Veselit ë ketë përdorur përfaqësuesen e Kosovës në futboll për fushatë elektorale.

Gashi në “Debat Plus” me Ermal Pandurin në RTV Dukagjini, ka thënë se prania e Veselit në takim me lojtarët ishte një motivim për ta dhe Federatën, përcjell Telegrafi.

“Kjo bazohet në faktin se kryetari Veseli është mbështetës i madh i sportit në Kosovë dhe padyshim se të gjitha sukseset, rezultatet dhe të arriturat në sport kanë qenë edhe meritë e tij pasi edhe mua si Ministër i Sportit më ka mbështetur për ngritjen e buxhetit të sportit në Kosovë, por në veçanti ka mbështetur Përfaqësuesen e Futbollit të Kosovës duke iu dhënë mbështetje dhe përkrahje atyre”.

Kandidati për deputetë nga PDK-ja ka thënë se Veseli edhe ne Bullgari ka mbështetur kombëtaren dhe i ka vizituar atje.

“Nuk bëhet fushatë me 12 lojtarë, pasi një pjesë e tyre madje nuk i kanë as familjarët në Kosovë”.

Gashi thotë se nuk bëhet fjalë për fushatë por Veseli ka motivuar lojtarët e Kosovës.

“Veseli tashmë ka krijuar një miqësi me lojtarët e Kosovës pasi i ka vizituar ata shpesh edhe gjatë stërvitjeve madje ka qenë edhe në darkë bashkë me ta”, tha ndër të tjera Kujtim Gashi./Telegrafi/