Gashi: Vdekja e Deharit, vrasje e pastër!

Avokati i familjes së Astrit Deharit, Tomë Gashi, ka deklaruar në emisionin “Politikë” në Tribuna Channel, se familja Dehari ka pësuar shok pas vdekjes së birit të tyre dhe se kanë angazhuar avokat për këtë rast. Ai ka përkujtuar se Dehari shkoi në pranga në paraburgim, dhe doli nga aty i vdekur në arkivol.

Gashi ka theksuar se vdekja ka qenë e dhunshmem sepse me zhiletin që është gjetur nuk ka mundur të kryhet vdekja.

“Familja ka kërkuar veç hetim të pavarur për zbardhjen e rastit. Familja kanë thënë se shteti ka përgjegjësi për vdekjen e birit të tyre, por nuk kanë përmendur emra të përveçëm. Nëse do të dihej se kush e ka kryer vrasjen, atëherë do të kishte tjera veprime. Sipas meje kjo është vrasje e pastër”, thotë Gashi.

Sipas tij, rasti nuk është zbardhur me publikimin e raportit të autopsisë.

“Prokurori e ka keqpërdor detyrën e tij, sepse ka thënë se janë kryer hetime, gjë që nuk është e vërtet. Prokurori, nuk ka iniciuar procedurë penale ndaj personave që kanë qenë përgjegjës për ruajtjen e Deharit”, thotë Gashi, i cili shton se “në këtë luftë speciale janë përfshirë edhe mediet duke i publikuar pamjet e kamerave”.

Ai ka përkujtuar se në xhirimet e publikuara vërehet se për katër minuta nuk duket askush i trishtuar për atë çka ka ndodhur brenda, pra as mjekja e as gardianët. Më pas ai ka shtruar pyetjet: pse ishte Astriti i mbyllur?

“Ku lihen terroristët vetëm në burg. Ata duhet të ruhen në mënyrë rigoroze”, ka thënë Gashi.

Shteti, sipas tij, nuk ka dashur të marrë përgjegjësi duke i shkarkuar personat përgjegjës. Por, thotë se shteti e ka pritur kryeprokurorin Sylë Hoxha që të dalë me deklaratë se Astriti ka kryer vetëvrasje.

“Hetime të pavarura nuk kanë mundur të kryhen nga persona të dyshimtë”, thotë ai.