Gabim në përkthim apo u pendua Vuçiq – cila është e vërteta për deklaratën rreth njohjes së Kosovës?

Ishte një lajm që bëri bujë të madhe. Pas njëzet viteve të luftës dhe negociatave të pafrytshme, një president i Serbisë – dhe një që ka pushtet absolut – la të kuptohet se më në fund, Serbia mund ta njohë Kosovën.

“Nuk mund ta njohim Kosovën, e të mos marrim ndonjë gjë nga ana tjetër”, raportoi të hënën pasdite agjencia e lajmeve Beta e Beogradit një përgjigje kyçe të Aleksandar Vuçiqit nga një intervistë për agjencinë italiane ANSA.

Ky formulim është interpretuar lehtë se “Vuçiq nuk e përjashton njohjen e mundshme të pavarësisë së Kosovës”.

Kështu, kjo deklaratë u shpërnda edhe nga mediat në Kosovë, por edhe nga media të njohura botërore.

Lexo po ashtu Vuçiq paralajmëron mundësinë e njohjes së Kosovës

Por siç shkruan Deutsche Welle, vesioni në gjuhën serbe, problemi është se në kohën e publikimit të në media të ndryshme, ANSA italiane dhe pastaj Beta serbe kryesisht e kanë korrigjuar “versionin origjinal”.

“Kishte probleme në interpretim, siç është shpesh rasti me gjuhët e huaja. Në koordinim me Zyrën e Presidentit, ne kemi vendosur për të korrigjuar lajmin”, ka thënë për Deutsche Welle, Franco Quintana, korrespondent i ANSA në Beograd.

Dhe siç shkruan tutje ky medium, versioni i korrigjuar thotë: “Nëse nuk arrihet një marrëveshje kompromisi mbi Kosovën do të jetë një katastrofë”.

Presidenti i Serbisë është i bindur se “ne mund të arrijnë një zgjidhje me ndihmën e miqve evropianë dhe me mbështetje të Rusisë, Amerikës, Kinës dhe vendeve të tjera”.

Ndonëse një deklaratë e tillë tanimë mohohet, ajo ka marrë dhenë, dhe çfarë pritet në vazhdim është të komentohet, nëse ishte “një gabim” apo një “vetëdijesim” i Vuçiqit për “gabimin e bërë”. /Telegrafi/