FSSHM me njoftim të rëndësishëm për sigurimet shëndetësore

Sistemi për sigurim shëndetësor mbetet i bllokuar dhe jashtë funksionit pas sulmit kibernetik më 6 shkurt. Autoritetet e Maqedonisë së Veriut sulmin kibernetik e kanë cilësuar si pjesë të luftës hibride që zhvillohet në Evropë pas agresionit rus në Ukrainë.

Nga ana tjetër nga Fondi Shëndetësor kanë dalë me njoftim:

Për personat e siguruar për të cilët nuk është regjistruar pagesa e kontributit të sigurimit shëndetësor në sistemin ‘Termini Im’ pas datës 05.02.2023, Fondi gjatë kësaj fundjave me detyrë zyrtare në bashkëpunim me DAP do të sigurojë dëshmi për kontribut të paguar.

Institucionet shëndetësore/barnatoret, kërkesën për verifikim të kontributit të paguar për të siguruarit mund ta dorëzojnë edhe të shtunën dhe të dielën në e-mail adresën e personave zyrtarë të autorizuar të shënuar në listë.

Të dhënat e verifikuara për kontributin e paguar, zyrtari i autorizuar i Fondit, po atë ditë do t’i dorëzojë në e-mail tek personi i institucionit shëndetësor që i ka kërkuar, thuhet në statusin e Fondit në rrjetin social facebook.

Shfrytëzuesit e shërbimeve shëndetësore druajnë nga keqpërdorimi i të dhënave të tyre personale, kurse nuk mund të paguhen as edhe mjetet që shkojnë përmes Fondit. /Telegrafi/