Finalizohet objekti i ri i stacionit të autobusëve në Ferizaj

Ekzekutivi në Ferizaj ka përfunduar punimet në stacionin e ri të autobusëve. Aktualisht komuna dhe menaxhmenti i stacionit janë në pritje të licencimit nga niveli qendror, ndërkohë do të bëhet edhe transferimi nga objekti i vjetër që gjendet në qendër të qytetit. Po ashtu stacioni i autobusëve është edhe në procesin e dhënies me qera të lokaleve brenda objektit të ri të stacionit.

Objekti i ri është ndërtuar në periferi të qytetit, ndërkohë në komunën e Ferizajt janë zotuar se menjëherë do të nisin procedurat për funksionimin e transportit urban brenda qytetit. Bileta për transportin urban pritet të jetë 0.50 cent.

Kryetari i komunës Agim Aliu, në një intervistë për telegrafin ka thënë se për shkak të transformimit të madh të qytetit shpeshherë po ndryshojnë edhe fotografitë e njerëzve që i bëjnë në Ferizaj. Ai ka bërë me dije se aty ku është e shtrirë dora e qeverisjes së tij, ka ndryshime dhe transformim.

Drejtoresha e stacionit të autobusëve, Albulenë Çalaj, ka thënë për telegrafin se tashmë objekti i shumëpërfolur është gati për funksionim.

“Stacioni i ri i autobusëve në Ferizaj është finalizuar dhe jemi në pritje të përmbylljes se disa proceseve ligjore që të transferohemi. Do të thotë jemi në proces te ankandit për dhënien me qera të lokaleve të ndërmarrjes si dhe procesin e licencës nga ministria e transportit që të kalojmë nga kategoria aktuale B në kategorinë A. Për qytetarët e Ferizajt nga komuna është menduar të ketë transport publik lokal, ku udhëtarëve ua mundëson qarkullimin nga stacioni deri te destinacioni i tyre brenda qytetit dhe anasjelltas. Ky transport do të filloj pasi të transferohemi në objektin e ri”, ka deklaruar Çalaj.

Kryetari i komunës Agim Aliu, në një intervistë për telegrafin, ka thënë se janë shumë afër për inaugurimin e stacionit të ri të autobusëve e pastaj do të zhvendoset stacioni vjetër dhe do të zhvillohet edhe trafiku urban.

“Qyteti është zgjeruar dhe ne e kemi për synim ta zhvillojmë sa më shumë trafikun urban dhe do të shohim se çfarë po ndodh edhe me BERZH-in sepse kemi kërkuar mbështetje edhe nga ata për transportin urban. Por derisa të ndodh ajo, ne do ta inagurojmë stacionin e autobusëve sepse aktualisht stacioni i vjetër është i ngarkuar, andaj tash do të jetë në një objekt shumë më të bukur dhe më funksional në Republikën e Kosovës”, ka thënë Aliu.

Sipas Aliut, aty ku është e shtrirë dora e qeverisjes së tij, ka ndryshime dhe ka transformim, ka projekte të bukura, por mbi të gjitha funksionale që i shërbejnë qytetarëve të Ferizajt dhe më gjerë.

“Ferizaj është bërë një epiqendër e vizitave për shkak të asaj se ne si qeverisje për gjatë këtyre viteve kemi transformuar sa që shpeshherë ndryshojnë fotografitë e njerëzve që i bëjnë në Ferizaj”, ka thënë Aliu. /Telegrafi/