Fatos Lubonja: Edi Rama ia ka dhënë Blendi Fevziut 3,4 apo 5 leje ndërtimi, mediat dhe politika në marrëdhënie “kriminale”

“Rama dhe Fevziu bënë një lloj teatri bashkë, se askush nuk pyet kush ia ka dhënë Fevziut ato 3,4 apo 5 lejet e ndërtimit për pallate, të cilat dihet që ia ka dhënë Rama e jo Berisha”, është shprehur analisti Fatos Lubonja, në emisionin Oktapod të Turjan Hyskës në Vizion Plus.

Sipas tij, media bën pjesë lidhëse në “ngrehinën” shoqërore që kanë ngritur qëllimisht, e nuk është “ndërtesë” më vete që do t’i kundërvihej politikës.

Lubonja përdori tone të ashpra për kryeministrin Edi Rama, duke e cilësuar të dhunshme qeverisjen e tij.

Sipas tij, Rama po ushtron dhunë fizike, psikologjike dhe vizuale, me shtimin kudo të prezencës së policisë.

“Dhuna tregon pafuqi qeverisjeje. Por, dhuna të ikën nga duart dhe krijon pasoja”, shton ai.

Lubonja theksoi se Rama nuk duhet të kërkojë vetëm varrin e shoqërisë civile, por edhe vrasësin dhe varrmihësin e tij.

“Politika sot po shet dhe ble me ekonominë informale dhe kriminale, çka bën që në Kuvend të mos ketë vetëm 19 kriminelë siç thotë opozita, por edhe shumë të tjerë që kanë pushtet ekonomik”, thekson analisti.

Lubonja nuk sheh shumë rrugë zgjidhjeje për Shqipërinë, duke mos e përjashtuar që “tuneli të bjerë mbi kokën e shqiptarëve” edhe njëherë akoma.

Sipas tij, shoqëria civile duhet të rezistojë, sepse nuk ka shpresë tjetër. Ai e quan “Idiot” projektin për Bulevardin, duke theksuar se Tirana duhet të ndalojë çimentizimin, pasi projektet duhet të bëhen ku ndodhet komuniteti dhe jo duke goditur komunitetin.

Lidhur me mundësinë e “përfitimit” politik të Lulëzim Bashës, Lubonja se fillimisht Basha duhet të vrasë “berishizmin”. /Telegrafi/