Facebook ndalohet edhe në një shtet tjetër

Qeveria e Papua Guinesë së Re ka bllokuar rrjetin social Facebook në atë që e përshkruan si një “test” për të zbutur gjuhën e urrejtjes, dezinformimin, pornografinë dhe “përmbajtjet e tjera të dëmshme”.

Testi i kryer sipas ligjeve kundër terrorizmit në vend, filloi mëngjesin e djeshëm dhe vijoi sot, transmeton Telegrafi.

Përdoruesit e Facebook në vend nuk kanë qenë në gjendje të hyjnë në platformë dhe është e paqartë se sa do të zgjasë ndalimi.

Lëvizja e qeverisë nuk u njoftua para “testit” të djeshëm – të cilin deputetët e opozitës dhe drejtuesit e medias e cilësuan si “tirani” dhe “shkelje të të drejtave të njeriut”.

Në një deklaratë, Ministri i Policisë së Papua Guinesë së Re, Peter Tsiamalili, tha se nisma ishte për të siguruar “përdorimin e përgjegjshëm” të rrjeteve sociale si Facebook, duke mbajtur “përmbajtje të dëmshme” jashtë diskursit publik.

“Megjithatë, përhapja e pakontrolluar e lajmeve të rreme, gjuhës së urrejtjes, pornografisë, shfrytëzimit të fëmijëve dhe nxitjes së dhunës në platforma si Facebook është e papranueshme. Këto sfida kërcënojnë gjithnjë e më shumë sigurinë, dinjitetin dhe mirëqenien e popullatës sonë”, tha ndër tjera.

Facebook është deri tani rrjeti social më i popullarizuar në vend, me rreth 1.3 milionë përdorues, ose rreth gjysma e 2.6 milionë përdoruesve të internetit të vlerësuar në vend.

Platforma është një mjet kyç për diskursin publik në vend, me shumë forume shumë aktive të përdorura për të diskutuar çështjet politike dhe sociale në Papua Guinenë e Re.

Megjithatë, qeveria ka qenë shumë kritike ndaj Facebook-ut, duke fajësuar shpesh platformën për përhapjen e dezinformatave, veçanërisht në dritën e një vale të fundit të vrasjeve fisnore në vend.

Ka kërcënuar prej kohësh një lëvizje kundër Facebook-ut, pasi shpalli një hetim parlamentar për “dezinformimin mediatik” në 2023.

Ndalimi shkaktoi një reagim të ashpër në Papua Guinenë e Re, me kryetarin e Bordit të Medias të Papua Guinesë së Re, Nevil Choi, i tha gazetës lokale Post-Courier se masa “kufizohet me autokracinë politike dhe abuzimin e të drejtave të njeriut”.

Deputeti i opozitës së Papua Guinesë së Re, Alan Bird, e përshkroi masën si “drakonike”.

“Dje Ministri i Policisë përdori ligjet kundër terrorizmit për të mbyllur Facebook-un, ishte vetëm një provë, ishte hapi i parë”, tha ai. /Telegrafi/