Facebook blen Oculus për 2 miliardë dollarë, sjell botën virtuale tek të gjithë

Gjiganti i rrjeteve sociale, Facebook tashmë e ka bërë publik planin e saj për përvetësimin e krijuesit të “botës virtuale” Oculus për një shumë marramendëse prej 2 miliardë dollarësh.

Vegla e famshme e Oculus, e quajtur Rift (e cila vendoset në kokë), është një pajisje vizuale për të luajtur video lojëra. Por drejtori dhe themeluesi i Facebook, Mark Zuckerberg tha se rrjeti social ka plane të mëdha për këtë pajisje.

Oculus u themelua në vitin 2012 nga Palmer Luckey, tani 21 vjeç, i cili ishte shkolluar në shtëpi dhe përvojën e tij të parë me teknologji e filloi duke bërë riparimin e iPhone-ëve të vjetër. Ai më vonë ka punuar si inxhinier në University of Southern California’s Institute for Creative Technologies.

Vetëm disa minuta pas njoftimit zyrtar, themeluesi i Oculus, Palmer Luckey e ka dhënë perspektivën e tij lidhur me shitjen e biznesit të tij tek Facebook.

“Kur Facebook fillimisht na ishte ofruar për partneritet, unë isha pak skeptik. Mirëpo, ndërsa unë u njoftova më shumë me vizionin e Facebook dhe pasi fola me Markun, partneriteti mes nesh morri një kuptim, sepse qëllimi ishte të ofrohej realiteti virtual për secilin” ka thënë Luckey.

Luckey e ka lavdëruar përkushtimin e Facebook për harduer dhe softuer të hapur dhe investimin e saj në Open Compute Project, ndërsa ka thënë se “partneriteti u mundëson atyre t’i ekzekutojnë disa nga idetë më kreative, duke marrë rreziqe të reja të cilat pa ndihmën e Facebook do të ishin të pamundura".

Themeluesi i Oculus ka thënë se blerja e kompanisë nga ana e Facebook do ta ndryshojë shumë pak kompaninë, ngjashëm sikurse është rasti me aplikacionin e famshëm WhatsApp.

Në përshkrimin e tij për Oculus, Luckey ka thënë se partneriteti me Facebook do ta sjell botën virtuale tek të gjithë, dhe se mënyra se si njerëzit luajnë lojëra do të ndryshojë përgjithmonë.

Reagimi i parë pas përvetësimit të Oculus VR nga ana e Facebook ka ardhur nga krijuesi i lojës Miecraft, Markus Persson i cili ka thënë se ai i ka ndërprerë të gjitha marrëveshjet e mundshme për versionin e lojës në Oculus Rift, pikërisht sepse Facebook tani do të jetë pronari i ri i kompanisë e cila e sjell realitetin virtual.

Duke e përshkruar vendimin e tij, Persson ka thënë se “Facebook më çmend”. / Telegrafi /