evroTarget, CubyLink dhe Horizonte-Group pjesë e panairit më të madh energjetik në Evropë “E-world energy & water”

Kompanitë gjermano-kosovare të eksporteve të shërbimeve në fushën e energjisë, evroTarget, CubyLink dhe HORIZONTE-Group në Gjermani, do të jenë pjesë e panairit më të madh energjetik në Evropë, E-world energy & water, i cili do të mbahet më 11-13 shkurt, në Essen të Gjermanisë.

E-world energy & water është panair ndërkombëtar, më i madhi në Evropë, i fokusuar në sektorin energjetik duke përfshirë energjinë elektrike, gazin, ujin dhe teknologjitë e lidhura.

E pashmangshëm, pjesë e këtij panairi, viti pas viti ka qenë dhe do të jetë sërish kompania kosovare evroTarget, që eksporton shërbime në fushën e energjisë, nga Kosova për tregun gjerman, por jo vetëm.

Po ashtu pjesë e panairit do të jetë edhe CubyLink dhe HORIZONTE-Group.

Themeluesi dhe drejtori ekzekutiv i HORIZONTE-Group dhe CubyLink, Bashkim Malushaj, thotë se me HORIZONTE-Group dhe kompani të tjera marrin pjesë në këtë panair që nga viti 2003, ndërsa me evroTarget para 12 viteve kanë marrë pjesë me shtand, derisa në tre vitet e fundit kanë marrë pjesë rregullisht.

“Arsyet e pjesëmarrjes me kompanitë tona në këtë panair janë të shumta, por veçojmë atë për të krijuar kontakte të reja, për të forcuar marrëdhëniet me klientët ekzistues dhe për të diskutuar tema të rëndësishme në një vend të vetëm. Pjesëmarrja ndihmon në zgjerimin e rrjetit të biznesit, identifikimin e mundësive të reja në treg dhe mbajtjen e hapit me zhvillimet më të fundit teknologjike”, thekson Malushaj.

Pjesëmarrja në këto panaire ka ndikuar që të ketë më shumë kontakte e kontrata të reja të cilat kanë rezultuar me vende të reja pune në evroTarget dhe CubyLink, duke ndikuar kështu në zhvillimin ekonomik të vendit.

Themeluesi dhe drejtori ekzekutiv i evroTarget, Hamdi Malushaj, thotë se pjesëmarrja ka ndikuar edhe në përmirësimin e imazhit të vendit.

“Ka shumë vite që ne jemi prezent në këtë panair, i cili është panairi më i madh në Evropë për çështjet energjetike. evroTarget është e fokusuar në eksportin e shërbimeve me projekte energjetike. Kemi krijuar qindra vende të reja pune dhe me kontaktet që i kemi pasur atje kemi ndikuar edhe në përmirësimin e imazhit të vendit tek investitorët gjigant në fushën e energjisë”, pohon Malushaj.

Rëndësia e pjesëmarrjes shtetërore në këtë panair

Themeluesi dhe drejtori ekzekutiv i HORIZONTE-Group, një kompani tejet e rëndësishme këshilldhënëse për Korporata Energjetike në Evropë, Bashkim Malushaj, shton se përfaqësuesit e shtetit të Kosovës duhet të marrin pjesë në këtë panair për shumë arsye, duke veçuar se aty marrin pjesë investitorët më të mëdhenj botëror në fushën e energjisë, dhe ky mund të jetë një mundësi e shkëlqyer për të ftuar investitor të huaj.

“Tregu energjetik është shumë i rëndësishëm edhe për Kosovën. Pjesëmarrja e përfaqësuesve shtetërorë do të ndihmonte në krijimin e lidhjeve ndërkombëtare, promovimin e interesave të Kosovës në sektorin energjetik dhe mundësinë për të tërhequr investitorë të huaj për projekte strategjike në fushën e energjisë.

Këtë proces mund ta mbështes me kontakt e mia”, thotë Malushaj.

Ai shton se me aq sa janë në dijeni, nuk ka pasur kompani tjera nga Kosova në këtë panair.

“Jemi krenarë që për kaq vite kemi marrë pjesë në panairin E-world wnergy & water, duke u takuar me shumë investitorë botëror në fushën e energjisë dhe kemi ndikuar në përmirësimin e imazhit të vendit.

Nuk kemi parë ndonjë kompani tjetër nga Kosova. Por, vlerësoj se është e domosdoshme pjesëmarrja e qeverisë së Kosovës pasi në këtë panair mund të takohen investitorët më të mëdhenj në fushën e energjisë, dhe është mundësi e shkëlqyer që të prezantohen përparësitë e shtetit në fushën e energjisë dhe kjo mund të ndikojë edhe tërheqjen e më shumë investitorëve të huaj në vend”, thekson Malushaj.