Escobar: Qeveria s’ka dhënë përgjigje për draft – statutin, ripërsërisim se nuk ka shtet brenda shtetit

I dërguari i Shteteve të Bashkuara për Ballkanin Perëndimor, Gabriel Escobar, duke folur për draft – statutin e Asociacionit, ka thënë se Qeveria e Kosovës ende nuk kanë dhënë ndonjë përgjigje konkrete, nëse e pranojnë ashtu siç është.

Andaj, thotë Escobar, SHBA-ja e ka të vështirë të kuptojë se pse nuk do Qeveria ta dorëzojë atë për shqyrtim kushtetues.

Ai ri-përsëriti se Asociacioni nuk do të ishte një ‘Republika Srpska’ brenda Kosovës.

“Pra, ne ende do ta inkurajonim Kosovën që të ecë përpara. Nuk do të ishte shtet brenda shtetit. Nuk ka asgjë në statut që lejon autoritete ekzekutive, pushtete ekzekutive, apo ndonjë gjë që mund të krijojë çështje kushtetuese apo funksionale për Kosovën”.

Është thjesht mundësi që komunat me shumicë serbe, të koordinojnë ofrimin e shërbimeve komunale në gjuhën serbe për qytetarët e Kosovës. Kjo është. Dhe është një detyrim ligjërisht i detyrueshëm. Pra, ne kemi dëgjuar shumë arsye të ndryshme pse nuk është dorëzuar ose pse nuk ka ecur përpara, por ne i refuzojmë të gjitha. Duhet të ecë përpara dhe duhet të ecë përpara sa më shpejt të jetë e mundur”, u shpreh më tej Escobar.

Ai beson se gjithë çështja e dinarit do të mund të zgjidhej përmes Asociacionit.

“Asociacioni, siç rekomandohet nga Bashkimi Evropian, nga përfaqësuesi special i BE-së, përfshin dispozita për transferimin transparent të parave nga Serbia tek ata që kanë të drejtë në Kosovë përmes një mekanizmi transparent sipas ligjit të Kosovës dhe brenda kornizës kushtetuese të Kosovës. . Pra, vetë shoqata do ta zgjidhte çështjen e dinarit dhe kështu dëshirojmë që Kosova të ecë përpara sa më shpejt”, ka deklaruar Escobar./Telegrafi/