Elvis Myrtaj eliminohet përfundimisht nga Big Brother VIP Albania

Gazetari Elvis Myrtaj, i njohur për mbulimin e kronikës së zezë, përfundoi aventurën e tij në shtëpinë e Big Brother VIP Albania 2 të martën pas televotimit javor.

Gjatë një mbrëmjeje të mbushur me emocione dhe pritje, Myrtaj u përball me sfidën e televotimit përballë çiftit të njohur në shtëpi, Romeo Veshaj dhe Heidi Baci.

Të tre konkurrentët u vendosën për televotim të shtunën pas një vendimi që erdhi nga Graciano, i cili përdori kutinë e pandorës për të dhënë emrat e nominuar.

Pavarësisht nga përpjekjet dhe strategjitë e ndryshme të përdorura brenda shtëpisë, Elvis Myrta nuk arriti të marrë mbështetjen e mjaftueshme nga publiku për të vazhduar konkurrencën në spektakël.

Fatkeqësia e Elvisit nuk përfundoi me largimin nga shtëpia, pasi pas daljes së tij, në studion e BBVA, ai zbuloi se nuk kishte fituar një “biletë kthimi” – një element i ri që ka shtuar një kthesë interesante në dinamikat e eliminimeve të këtij sezoni të “Big Brother VIP Albania”.

Gazetari Myrtaj do të mbahet mend për kontributin dhe karakterin e tij unik në shtëpi, ndërsa spektakli vazhdon me lojtarët e tjerë që synojnë të mbijetojnë dhe të triumfojnë në sfidën e madhe të “Big Brother VIP Albania”. /Telegrafi/