Ekspozitë në Galerinë Kombëtare të Maqedonisë: “100 vjet nga lindja e Ibrahim Kodrës”

Galeria Kombëtare e Maqedonisë, në bashkëpunim me Galerinë e Nacionale të Kosovës dhe Fondacionin “Ibrahim Kodra” nga Italia, me rastin e 100-vjetorit të lindjes së piktorit të madh shqiptar me famë botërore, Ibrahim Kodrës, për herë të parë do të hapin një ekspozitë të pavarur me pikturat e tij.

Ambasadorët e Shqipërisë dhe Italisë në Shkup theksuan se Kodra gjatë veprimtarisë së tij u njoh për stilin e tij të veçantë artistik me anë të të cilit arriti edhe famën ndërkombëtare. Ata theksuan se Kodra i ka dhënë shumë jo vetëm artit shqiptar dhe atij italian, por edhe artit europian dhe botëror.

“Mjeshtri, Ibrahim Kodra, është e vërtetë se është shqiptar nga gjaku, por ai tërë jetën dhe veprimtarinë e tij e ka zhvilluar në Itali, e posaçërisht në Milano, kështu që në njëfarë mase ai me të vërtetë është një qytetar evropian. Kjo jo vetëm për faktin se ai i përket Evropës, por talenti i tij, lidhjet e tij me piktorët më të mëdhenj të kohës, Picasso dhe të tjerë, tregon se ka qenë shumë i vlerësuar dhe pikturat e tij janë ekspozuar në shumë ekspozita të botës dhe shumë institucione të larta të shtetit italian”, deklaroi ambasadori i Shqipërisë, Fatos Reka.

“Me rastin e ekspozitës së mjeshtrit, Ibrahim Kodra, është edhe një rast i bashkimit të shumë shteteve që janë pjesëmarrëse në këtë rast. Bëhet fjalë për bashkëpunim mes shteteve me të cilat Italia historikisht ka mbajtur raporte të mira historike. Bëhet fjalë për një diplomaci kulturore do ta quaja, pasi edhe qëllimi kryesor i kulturës dhe artit”, theksoi ambasadori i Italisë, Karlo Romeo.

Për realizimin e ekspozitës janë angazhuar drejtpërdrejtë sekretari shtetëror në Ministrinë e Kulturës dhe drejtoresha e Galerisë Kombëtare.

“Një ndër ëndrrat që kishim vitin e kaluar që të sjellim pikturat e të madhit, Ibrahim Kodra, në Galerinë Kombëtare të Maqedonisë, pikërisht në përvjetorin e lindjes së tij dhe krijimit të Galerisë Kombëtare. Kjo u arrit falë bashkëpunimit dhe punës së palodhshme të kësaj drejtorie dhe ndihmesës së dy ambasadave dhe shteteve të Shqipërisë dhe Italisë”,- u shpreh sekretari shtetëror në Ministrinë e Kulturës, Valmir Aziri.

“Edhe pse kanë kaluar 100 vite nga lindja e Ibrahim Kodrës, jubiletë e këtij lloji janë vetëm një mënyrë për të kujtuar pozitat historike dhe kuptimin e krijimtarisë së një autori kaq të njohur”, deklaroi drejtoresha e Galerisë Kombëtare, Dita Starova.

Ndryshe, ekspozita do të hapet më 12 maj në orën 20:00, në Galerinë Kombëtare të Maqedonisë, në objektin Çifte Hamam dhe do të qëndrojë e hapur deri më 12 qershor të këtij viti.

Piktori, Ibrahim Kodra, ka lindur në vitin 1918, ndërsa ka ndërruar jetë në Milano të Italisë më 7 shkurt të vitit 2006 dhe është varrosur në atdheun e tij në Shqipëri, që ishte dëshira e tij e fundit. /RTM/