Efekti i coronavirusit, bie vlera e futbollistëve të Kosovës – Rashica mbetet i pari, por humb shtatë milionë nga vlera e tij

Coronavirusi ka shkatërruar shumë ekonominë botërore, por ky virus ka ndikuar për të keq edhe në futboll.

Kampionatet janë pezulluar përkohësisht dhe klubet tanimë kanë raportuar humbje të mëdha financiare.

Falë kësaj ndalese të futbollit ka rënë ndjeshëm edhe vlera e futbollistëve në tregun e transferimeve.

Rastet më të mira te vlerat e rëna të lojtarëve janë edhe te Kylian Mbappe që vlen tani vetëm 180 milionë, Lionel Messi me vlerë prej vetëm 112 milionë euro apo pesë herë fituesi i Topit të Artë, Cristiano Ronaldo që ka vlerën prej 60 milionë euro.

Lexo po ashtu Efekti i coronavirusit, bien çmimet e futbollistëve: Messi bie në pozitën e nëntë, ndërsa Ronaldo në të 46-tën

Por nga pandemia Covid-19 që ka paralizuar futbollin janë prekur edhe vlerat e futbollistëve të Kosovës.

Mediumi i specializuar për vlerën e futbollistëve, Transfermarkt ka përditësuar edhe çmimet e reja të futbollistëve tanë.

Vlerën më të madhe e ka humbur Milot Rashica, i cili tani kushton 28 milionë nga 35 sa ishte vlera e tij një muaj më parë.

Megjithatë Rashica vazhdon të mbajë primatin si futbollisti më i shtrenjtë i Kosovës.

Rënie kanë pësuar edhe dyshja Amir Rrahmani dhe Vedat Muriqi, që kushtonin nga 12 milionë euro dhe tani kanë vlerë prej 9,5.

Nga pozita e katërt deri në të shtatën janë Bersant Celina, Arbër Zeneli, Florent Hadergjonaj dhe Valon Berisha që më parë kartoni i tyre vlerësohej pesë milionë euro.

Megjithatë të katër këta futbollistë të Përfaqësueses kanë humbur nga një milionë euro te vlera e tyre dhe tani kushtojnë nga katër milionë.

Në pozitën e tetë mbetet Idriz Voca që vlera e tij ka rënë për 800 mijë euro dhe tani kushton 3,2 milionë, ndërsa në të nëntën ndodhet Mërgim Vojvoda që ka humbur 500 mijë euro nga vlera e mëparshme dhe tani vlerësohet dy milionë.

Listën prej 10 futbollistëve me vlerën më të madhe e mbyll portieri Arijanet Muric me 1,8 milionë euro vlerësim, duke humbur 200 mijë nga çmimi i tij i para një muaji.

Të gjithë futbollistët e grumbulluar në ndeshjet e fundit me Përfaqësuesen e Kosovës kanë humbur nga 10-20% nga vlera e tyre pas krizës që ka kapluar botën e futbollit pas shpërthimit të pandemisë.

Megjithatë me rikthimin në normalitet, duke parë formën e shkëlqyer të futbollistëve tanë pritet që vlera e tyre të rritet përsëri dhe të kalojë atë të mëparshmen.

Lojtari më i shtrenjtë i Kosovës, Milot Rashica tani që vlerësohet 28 milionë euro, vlen të ceket se ka klauzolë largimi nga Werderi prej 38 milionë eurove, klauzolë që vlen vetëm për skuadrat jashtë kufijve të Gjermanisë. /Telegrafi/