Edon Zhegrova flet pas paraqitjes heroike ndaj Real Madridit: Shpirti i ekipit bëri diferencën ndaj kampionit evropian

Edon Zhegrova ka zhvilluar një nga ndeshjet më të mira në karrierë, teksa shkëlqeu në fitoren e Lille 1-0 ndaj kampionit në fuqi të Evropës, Real Madridit.

Sulmuesi kosovar fitoi penalltinë të cilin e shënoi Jonathan David, derisa në fund u shpall edhe lojtari më i mirë i ndeshjes.

Pas fitores historike të Lille dhe çmimit të marrë nga UEFA, Zhegrova ka folur për faqen zyrtare të shtëpisë më të madhe të futbollit evropian.

25-vjeçari ka thënë se shpirti i ekipit të Lille bëri diferencën, pasi të gjithë lojtarët kanë dhënë gjithçka nga vetja për të marrë këtë fitore.

𝐄𝐙𝟐𝟑 ⭐️🏆@NBFootball pic.twitter.com/2wUZO2uESd

— LOSC (@losclive) October 3, 2024

“Mendoj se shpirti i ekipit tonë e bëri diferencën. Secili dha gjithçka nga vetja, në secilën pozitë. Kjo ishte ajo që e kërkoi trajneri sepse e dimë që Real Madridi ka kualitet të madh”, deklaroi Zhegrova.

“Por, mendoj se ishte shpirti i ekipit dhe të gjithë së bashku, që e bëri diferencën”.

Tutje reprezentuesi kosovar tha se qëllimi është të shkojnë sa më larg në Ligën e Kampionëve, edhe pse e dinë që nuk është e lehtë pasi përballë kanë top klubet evropiane.

𝑴𝒂𝒏 𝒐𝒇 𝑻𝒉𝒆 𝑴𝒂𝒕𝒄𝒉 🏆@ChampionsLeague #LOSCRMA pic.twitter.com/IxXz6O4uag

— LOSC (@losclive) October 2, 2024

“Besoj se, nëse vazhdojmë kështu, me të njëjtin mentalitet dhe të njëjtin shpirt, shpresoj se mund të shkojmë sa më larg që të jetë e mundur”.

“Por, ne e dimë se Liga e Kampionëve është një garë e madhe me ekipe të mëdha, por duhet të mundohemi ta fitojmë çdo lojë”, u shpreh sulmuesi dardan. /Telegrafi/