Vuçiq ende në iluzione, thotë se në OKB nuk u miratua rezoluta për Srebrenicën

Presidenti serb, Aleksandar Vuçiq iu drejtua Asamblesë së Përgjithshme të OKB-së pas votimit dhe falënderoi ata që votuan kundër dhe ata që nuk votuan për Rezolutën që njeh gjenocidin në Srebrenicë.

“Nuk ka ndodhur asnjëherë në Asamblenë e Përgjithshme të OKB-së që të mos kalohet njëzëri për çështjen e gjenocidit, nuk ka ndodhur asnjëherë dhe tani po ndodh për herë të parë sepse disa njerëz deshën ta politizojnë këtë temë të rëndësishme dhe e bënë këtë”, tha ai.

Lexo po ashtu Vuçiq e vuan rezolutën e OKB-së për gjenocidin në Srebrenicë - ngushëllohet nga Marko Gjuriqi

Udhëheqësi serb deklaroi se qëllimi i vetëm i Rezolutës ishte “transferimi i fajit moral dhe politik te një komb”.

“Të them të drejtën, kur është fjala për legjitimitetin, nuk ia dolën”, tha presidenti i Serbisë, shkruan nova.rs.

“Ata njerëz që donin të stigmatizojnë popullin serb nuk ia dolën dhe nuk do të kenë sukses”, shtoi ai.

Lexo po ashtu Kur Vuçiq thoshte se "për një serb të vrarë, do të vrasim njëqind myslimanë në Bosnje"

Asambleja e Përgjithshme e OKB-së miratoi sot një rezolutë për Srebrenicën, duke shpallur 11 korrikun si Ditën Ndërkombëtare të Kujtimit të Gjenocidit në Srebrenicë në vitin 1995, e cila duhet të festohet çdo vit. Rezoluta u miratua me 84 vota pro, 19 kundër dhe 68 abstenime.

Kujtojmë se 8372 persona janë vrarë vetëm gjatë disa ditëve të korrikut të vitit 1995 në Srebrenicë. Numri i viktimave në Bosnje ka qenë shumë më i madh – mbi 100 mijë të vrarë.

Ndryshe, krimi u njoh si gjenocid nga Gjykata Ndërkombëtare e Drejtësisë në Hagë në vitin 2007. /Telegrafi/