E veja e George Best thotë se fantazma e tij po ia lëviz gjësendet nëpër shtëpi

E veja e George Best, Alex, thotë se fantazma e burrit të saj ia lëviz gjësendet dhe i ndez dritat në shtëpinë e saj në Surrey.

Çelësat e fshehur dhe telefoni i humbur janë tjetër vepër e fantazmës së legjendës së Manchester Unitedit – pohon 44-vjeçarja.

Ish-modelja thekson se një person që kontakton me fantazmat (‘medium’) i ka thënë se burri i saj e ka dashur aq shumë, saqë nuk është i gatshëm të largohet krejtësisht.

Njëherësh, Michael Codori – personi që merret me fantazmat, i ka thënë se prania e fantazmës së Best (i cili ndërroi jetë në vitin 2005 si pasojë e dështimit të organeve nga konsumimi i tepruar i alkoolit) e ka penguar atë që të dashurohet sërish.

Ajo është e bindur se George e ka ndjekur në dy shtëpitë e mëparshme dhe tashmë është mësuar “të jetojë me të” – transmeton Telegrafi.

“Ishte një befasi e këndshme ardhja e George. Michael më dha detaje nga një ngjarje shumë e veçantë dhe personale që e dinim vetëm George dhe unë. Ishte nga koha kur dolëm bashkë për herë të parë”, ka thënë Alex për The Sun duke treguar se nga ky moment filloi t’i besonte atij.

Ndryshe, anësori irlandez i kaloi vitet më të mira të karrierës së tij te Manchester Unitedi (1961-1974), klub me të cilin mes tjerash e fitoi Kupën e Evropës (sot Liga e Kampionëve) në vitin 1968. Irlanda e Veriut e ka quajtur lojtari më i mirë që e ka veshur ndonjëherë fanellën e kësaj përfaqësuese. /Telegrafi/