E ardhmja ka arritur dhe quhet VR!

Festivali i filmit dhe dokumentarit, “Dokufest”, festivali më i madh në Kosovë, këtë vit do të fillojë me datë 4 gusht dhe do të përmbyllet më 12 gusht.

Duke filluar nga data 31 korrik, Dokufest do të zbarkojë fillimisht në Prishtinë për të vazhduar rrugëtimin e tij aty ku tashmë jemi mësuar ta shohim, në qytetin e bukur të Prizrenit, ndërsa në këtë edicion në bashkëpunim me Gjirafa Video vjen një befasi për publikun.

Është edicioni ynë i të ARDHMES dhe ne, në bashkëpunim me Gjirafa Video po sjellim kinemanë tonë të 10-të si një befasi, ku audienca jonë mund të futet në një eksperiencë të Realitetit Virtual dhe të marrë një udhëtim për në të ardhmen – thuhet në një njoftim të DokuFest.

Kjo kinema sjell eksperiencën unike të realitetit virtual, ku shikuesit do të kenë mundësinë të eksplorojnë thellësitë e oqeanit në ‘Chasing Coral: Përvoja VR’, botën e një të verbëri në ‘Shënime mbi Ngjyrën e Verbër’ dhe magjinë e vallëzimit kuban në ‘Historinë e Vallëzimit Kuban’.

Kinemaja do të jetë e lirë dhe e hapur çdo ditë të festivalit nga ora 10:00 deri në orën 10:00 në zonën “KEJ” pranë lumit.