Dy milionë maska mbrojtëse që bleu Finlanda nga Kina rezultuan të papërshtatshme

Dy milionë maska mbrojtëse që bleu Finlanda nga Kina, kanë rezultuar të papërshtatshme për t’u përdorur në spitale, përcjell Telegrafi.

Ministrja e Shëndetësisë së Finlandës, Aino-Kaisa Pekonen, kishte lajmëruar në Twitter për dërgesën e parë të dy milionë maskave kirurgjikale dhe 230 mijë të tjera për frymëmarrje, që ishin shkarkuar në aeroportin e Helsinikit nga një fluturim i qytetit Guangzhou të Kinës, duke deklaruar se ato do të kontrolloheshin para se të hyjnë në përdorim.

Mirëpo, të mërkurën zyrtarët zbuluan se maskat e porositura nuk plotësonin standardet e kërkuara të mbrojtes kundër coronavirusit, për t’u përdorur në mjediset mjekësore.

“Sigurisht që është zhgënjim për ne”, tha sekretarja e ministrisë së shëndetësisë, Kirsi Varhila në një konferencë për shtyp.

Sipas zyrtarëve, tani Finlandës i duhen rreth gjysmë milionë maska kirugjikale dhe 50 mijë maska respiratore në ditë, pasi disa rajone kanë paralajmëruar për mungesën e tyre.

Lidhur me këtë rast kryeministrja finlandeze, Sanna Marin, u sulmua sot nga disa autoritete lokale në Twitter, duke e akuzuar qeverinë që nuk i kanë grumbulluar pajisjet mbrojtëse prej tre deri në gjashtë muaj, siç ishte paraparë nga plani i gatishmërisë pandemike në Finlandë. /Telegrafi/