Doli duke pirë duhan nga gërmadhat, turku tregon se si mbijetoi për tre ditë

Turqia është goditur prej dy tërmeteve të fuqishme duke shkaktuar viktima të shumta dhe dëme të mëdha materiale.

Soner Tugtekin ishte një ndër personat e shumtë që u shpëtua prej gërmadhave. Në momentin që po nxirrej prej rrënojave, ai kishte në gojë një cigare.

I mbijetuari i qytetit të Adiyamanit ka folur për herë të parë për mediat turke duke treguar se si mbijetoi, raporton t24.com.tr.

“Unë kisha vetëm duhan dhe 1.5 litër ujë me veti. Duke pirë shumë cigare, gazi i shkrepëses më mbaroi. E kam zgjidhur problemin e zjarrit duke shfrytëzuar bateritë e telekomandës. Kabllot e saja i përplasja dhe ndizja cigaren”, tha ai.

Duke thënë se u përpoq të mbijetonte me ujë dhe duhan për tre ditë, Tugtekin deklaroi se “ne po kërkonim ndihmë. Kur erdhi përgjigja, fillova t’i ndez cigaret njëra pas tjetrës. Prandaj kisha një cigare në dorë kur dola. Nuk doja të shkoja në spital sepse nuk doja të largohesha nga Hatixheja. Fjeta në trotuar dhe prita derisa e nxorën prej rrënojave trupin e pajetë të bashkëshortes sime”, tha ai.

Ndryshe, Turqia deri më tani ka regjistruar mbi 35 mijë viktima ndërsa raportohet se shumë të tjerë janë nën gërmadha. /Telegrafi/