Dita e derbive në Superligën e Maqedonisë: Struga përballet me Shkëndijën, Shkupi pret Vardarin

E diela do të sjell dy derbi në Superligën e Maqedonisë së Veriut në kuadër të xhiros së 13-të.

Në Strugë, do të përballen kampionët në fuqi me Shkëndijën e Tetovës. Të dyja skuadrat shqiptare janë në top 3-shën e tabelës dhe diferenca ndërmjet tyre është vetëm një pikë, me tetovarët që janë para struganëve. Bruno Dita nga radhët e Shkëndijës ka thënë se ndeshja me Strugën është moment i duhur për të treguar forcën.

“Po është e vërtetë ndeshja me Strugën vjen në momentin e duhur, për një rival direkt, ndeshje e fortë ku secili motivimin e gjen brenda vetes. Do thoja që është ndeshja e duhur për të treguar forcën tonë”, ka thënë Bruno Dita.

Ndërkohë derbi do të ketë edhe në Çair, aty ku Shkupi pret rivalin e vjetër, Vardarin. Golashënuesi më i mirë i bardhekaltërve, Arbi Vosha ka folur para këtij dueli.

“E dimë që është ndeshje derbi, por për ne edhe kjo është si çdo ndeshje tjetër, andaj të gjithë në ekip e kemi marrë këtë lojë me shumë qetësi. Sigurisht se kemi punuar me shumë përkushtim dhe jemi përgatitur maksimalisht për lojë, duke shpresuar se besuar se mundë të marrim tri pikë. Në fund dua të them që pas ndeshjes do të festojmë së bashku me “Shvercerat” që si gjithmonë kanë dëshmuar se janë lojtari ynë i 12-të, andaj u bëjë thirrje që të jenë në numër sa më të madh, të mbushim tribunat, të na përkrahin gjatë ndeshjes dhe në fund të festojmë siç na ka hije”, është shprehur Vosha.

Të dy derbit Struga – Shkëndija dhe Shkupi – Vardari luhen sot, duke nisur nga ora 13:00. /Telegrafi/