Komisioni për Legjislacion diskuton për raportin e Transparency International, mungon pozita

Komisioni për Legjislacion ka thirrur një mbledhje për të diskutuar vetëm për raportin e Transparency International rreth indeksit të perceptimit të korrupsionit.

Por, në këtë mbledhje kanë marrë pjesë vetëm deputetet e opozitës, ndërkohë asnjë përfaqësues i pozitës nuk ka marrë pjesë në këtë diskutim, njofton Klan Kosova.

Ndërkohë të pranishëm kanë qenë edhe pjesëtarë të shoqërisë civile, si dhe nga Agjencia e Anti-korrupsion, Prokuroria dhe Gjykatat.

Deputetja e Nisma për Kosovën, Valdete Bajrami ka thënë se përmirësimet janë shumë minimale dhe të padukshme në realitetin e vendit tonë.

“Asnjë institucion nuk është i pavarur, janë njerëz të adresuar nga partitë politike.Ky indeks tregon se vendi ynë edhe më tutje dëshiron të mbetet i izoluar, nuk ka vullnet nga ana e atyre që janë në Qeveri për të luftuar krimin e organizuar dhe korrupsionin. Ky raport dhe indeks duhet të merret me shumë seriozitet, që të përmbushin detyrat”, ka thënë ajo.

Kritika ka dhënë edhe Pal Lekaj, që ka thënë se vetë mosprezenca e deputetëve të pozitës tregon se sa janë të gatshëm institucionet që ta luftojnë korrupsionin.

Ndërsa raportin e Transaparancy Internationl, e ka prezantuar Artan Canhasi nga KDI. Ai ka thënë se Kosova ka shënuar një progres të vogël ku ka marrë tri pikë më shumë se vitin e kaluar.

Sipas tij, ky përmirësim ka ardhur si pasojë e përmirësimit të prokurimit publik.

Por, ai  ka shtuar se Kosova ka humbur 300 milionë euro nga MCC (sfidat e mijëvjeçarit), ndërsa ka kërkuar që të ketë një Komision Hetimor Parlamentar për të kuptuar se pse janë humbur këto para.

Ndërkohë gjyqtari i Krimeve të Rënda, Arben Hoti, ka thënë se pranimi i faktit ose identifikimi i problemit është kruciale.

“Në luftën kundër korrupsion është me rëndësi që Prokuroria dhe Policia të kryejë punën e saj. Ka aktakuza për korrupsionin, që Prokuroria dhe Policia kanë dyshim të bazuar, por është problem të vërtetohen provat. Në Gjykatën Themelore të Prishtinës të gjitha lëndët e korrupsionit janë në punë”, ka thënë ai.