Real Madridi ka konfirmuar zyrtarisht sot (e premte) nënshkrimin e Trent Alexander-Arnold nga Liverpooli, por jo si lojtar i lirë.
Alexander-Arnold kishte edhe dy muaj kontratë me Reds para se të bëhej lojtar i lirë në mes të verës.
Megjithatë, Los Blancos nuk i kanë lënë asgjë rastit dhe kanë vendosur të paguajnë një shifër prej 10 milionë eurosh te Liverpooli, duke mbuluar edhe kontratën për dy muajt e ardhshëm.
“Real Madridi do t’i paguajë Liverpoolit një tarifë transferimi prej rreth 10 milionë eurosh për të pasur Trent Alexander-Arnoldin në Kupën e Botës për Klube”.
“Real Madridi gjithashtu do të mbulojë pagën e tij për qershorin dhe korrikun si pjesë e marrëveshjes me Liverpoolin”, ka zbuluar ekspertit i transferimeve, Fabrizio Romano.
Romano gjithashtu ka zbuluar se Real Madridi i ka vendosur edhe një klauzolë marramendëse largimi mbrojtësit anglez.
“Kuptohet që klauzola e lirimit në kontratën e Trent Alexander-Arnold do të jetë 1 miliard euro”, thuhet në postimin e Romanos. /Telegrafi/
