Deputeti Strazimiri proteston me armë në brez

Deputeti i Partisë Demokratike, Gent Strazimiri, ka shkuar me pistoletë në brez në protestën e sotme të opozitës, kundër këndit të lojërave në parkun e Liqenit Artificial të Tiranës.

Në foton e mësipërme, deputeti shfaqet me pistoletë në brez, dhe një kapelë kaubojsi që të krijon përshtypjen sikur jemi në “Far West” dhe jo në Tiranë. Bashkë me deputetët e tjerë, ai është përplasur fizikisht me policinë.

Nuk dihet çfarë qëllimi ka deputeti që mori armë me vete, por vetë Strazimiri duke folur për mediat, ka thënë se janë angazhuar mijëra policë dhe në kundërshtim me ligjin, janë me pistoletë në brez.

“Janë angazhuar nga 2500 forca që ka i gjithë Qarku i Tiranës, rreth 1800 forca. Të gjithë në mbrojtje të paligjshmërisë, pjesa më e madhe të cilën ju ftoj ta dokumentoni, janë pa numër identifikimi të policëve. Janë të gjithë, nga i pari deri tek i fundit, me armë në brez. Kjo është rreptësisht e ndaluar nga ligji, në të tilla raste”, tha Strazimiri, që ndërkohë ishte vetë me pistoletë në brez. /Telegrafi/