Dënohet me burg të përjetshëm burri nga Kamenica që e vrau gruan e tij me shufër të hekurit

Nuhi Mavrovqani, është dënuar sot me burgim të përjetshëm nga Gjykata Themelore në Gjilan, pasi kishte vrarë gruan e tij duke e goditur me një shufër, më 25 korrik në Kamenicë.

Lajmin për Telegrafin e ka konfirmuar zëdhënësi i Gjykatës Themelore në Gjilan, Sabit Shkodra.

Ndërkaq, sipas një komunikate për media, thuhet se tragjedia ndodhi pas një mosmarrëveshjeje mes bashkëshortëve në shtëpinë e tyre.

“I akuzuari me datë 25.07.2020 rreth orës 12:00 minuta, në shtëpinë e tyre të përbashkët në fshatin Berivojcë, Komuna e Kamenicës, për shkak të mosmarrëveshjeve të vazhdueshme familjare më parë dhe në ditën kritike, më dashje e ka privuar nga jeta anëtaren e familjes, bashkëshorten e tij tani të ndjerën S. M., në atë mënyrë që fillimisht janë fjalosur e më pas i pandehuri ka marr një shufër metalike – mjet të përshtatëm me gjatësi 73 cm, e godet fillimisht në parakrahun e dorës së majtë dhe më pas njëherë në anën e majtë të kokës e cila rrëzohet në dysheme, më pas i pandehuri vazhdon të godas me shufër metalike disa herë në kohë dhe në anën e djathtë të kokës, në fytyrë afër syrit , duke i shkaktuar plagë të hapura në kokë, thyerje në anën e majtë të kafkës, të cilat plagë kanë qenë vdekjeprurëse”, thuhet në komunikatë.

Lexo po ashtu Vrasje e rëndë në Kamenicë, dyshohet se burri mbyti me shufër metalike gruan e tij

Në komunikatë thuhet po ashtu se me këto veprime, i akuzuari ka kryer veprën penale “vrasje e rëndë”.

“Trupi gjykues i Departamentit të Krimeve të Rënda, në përbërje të kryetarit, Zyhdi Haziri dhe anëtarëve Ramiz Azizi dhe Naser Maliqi, pas dëgjimit të dëshmitarëve dhe shtjellimit të provave, ka shqiptuar dënim me burgim të përjetshëm për të akuzuarin N. M”, thuhet në komunikatë”

Tutje sipas komunikatës, kolegji i gjyqtarëve nuk ka gjet ndonjë rrethanë lehtësuese për të akuzuarin, por të gjitha rrethanat kanë qenë rënduese, duke marrë parasysh prezencën e fëmijëve në ditën kritike, gjendja e të ndjerës dhe fëmija i porsalindur (një muajsh), kanë dhënë arsye që dënimi të jetë kapital. /Telegrafi/