Demi: Luliano e ka marrë seriozisht punën, por të gjitha do i tregojë koha

Skuadra e Partizanit ka zyrtarizuar ditën e sotme trajnerin e ri Mark Luliano.

Në një konferencë për shtyp të mbajtur në ambientet e klubit, i pranishëm ka qenë edhe presidenti Gazment Demi, i cili është shprehur optimist në lidhje me emërimin e teknikut të ri në stolin e të kuqve. Demi deklaroi se Luliano ka më shumë energji dhe e ka marrë seriozisht punën për të ndihmuar skuadrën drejt ecurisë pozitive në kampionat dhe Kupat e Evropës.

Gjithashtu presidenti i të kuqve ka folur edhe për largimin e trajnerit Starova duke deklaruar se ai do të vazhdojë të jetë pjesë e Partizanit, si dhe për postin e ri drejtues të ish-drejtorit të përgjithshëm Genc Tomori, transmeton PanoramaSport.

Demi është ngacmuar nga gazetarët për mungesën e derbit me Tiranën dhe ai ka propozuar që të organizohet një kupë vetëm për derbin.

Emërimi i Lulianos?

“Partizani s’ka arritur të marrë akoma një trofe, jemi lodhur duke qenë të dytët apo të tretët, pavarësisht se kemi qenë në garë deri në momentet e fundit. Pa hequr dorë nga gjërat që janë bërë në të shkuarën, shoqëria ka filluar të bëjë një organizim të ri, në vrazhdën dhe të investimit të madh në akademi. Luciano Moggi do të jetë këshilltar i përgjithshëm jo vetëm për skuadrën e parë, por për të gjithë sport klub Partizanin.

Zotëria na solli një djalosh simpatik në pamje, por që flitet që është edhe një trajner i niveleve të mira për kushtet e futbollit shqiptar. Shpresoj që këtë vit të fitojmë titullin kampion dhe të ecim sa më larg në Kupat e Evropës. Luliano ka një eksperiencë 10-vjeçare si trajner, e ka marrë shumë seriozisht punën për ta ndihmuar skuadrën që të ecë sa më mirë. Të gjitha do t’i tregojë koha, ne të gjithë si drejtues, jemi seriozë për një ecuri sa më të mirë të Partizanit.”

Largimi i Starovës?

“Për sa i përket Starovëz, do të jetë në stafin e Partizanit, por nuk dua të flas për zhgënjimet e sezonit të kaluar pasi sot do prezantojmë trajnerin e ri. Luliano ka energji më të madhe se trajnerët e tjerë, si dhe pamjen e ka më simpatike si dhe shumë serioz.”

Rikthimi i Genc Tomorit?

“Genc Tomori nuk është larguar asnjëherë nga Partizani. Edhe kur unë nuk kam qënë, ai ishte pjesë e klubit. Genci në qoftë se ka dhënë dorëheqjen nga drejtor i përgjithshëm, është një njeri me karakter, që nuk mund ta lerë presidentin dhe ndërrmarjen në rrugë. E sigurt është që ai do të jetë brenda Partizanit, nuk ka rëndësi posti.”

Mungesa e derbit?

“Kam një opinion të bëjmë një kupë vetëm për derbin. Patjetër që do më marri malli për të.”

Titulli që iu hoq Skënderbeut?

“E dinë këto të Federatës, duhet të mblidhet Komiteti për të vendosur për të. Kam besim Federata është serioze.”

Zgjedhja mes titullit dhe stadiumit që po ndërtohet?

“I dua të gjitha, edhe titullin edhe kupën edhe stadiumin. Por për mua personalisht, kompleksi i ri që po ndërtohet është trofeu më i madh.”