Policia e Elbasanit ka bërë publike pamjet nga një aksion i gjerë antidrogë, ku u arrestuan dhjetëra persona dhe u sekuestruan armë, drogë e municione.
Sipas njoftimit zyrtar, strukturat e Hetimit të Krimeve të DVP Elbasan, në bashkëpunim me Prokurorinë, pas disa muajsh hetime me metoda speciale, finalizuan operacionin policor të koduar “First Day”, që kishte në fokus goditjen e shpërndarjes së drogës në Elbasan, Librazhd, Gramsh, Cërrik, Peqin, Belsh dhe Prrenjas.
Në kuadër të operacionit u ekzekutuan masat e sigurisë “Arrest në burg” 30 persona të dyshuar për prodhim dhe shitje të lëndëve narkotike.
Gjithashtu, disa të tjerë u arrestuan në flagrancë për vepra të ndryshme penale, mes tyre edhe armëmbajtje pa leje dhe kontrabandë.
Gjatë kontrolleve policia sekuestroi:
sasi kokaine dhe kanabisi,
armë zjarri pistoletë dhe kallashnikov, armë gjahu, municion luftarak,
peshore elektronike, thika, përforcues grushti,
steka duhani të dyshuara kontrabandë, laptopë, tabletë, DVR, targa automjetesh shqiptare e belge,
shuma të konsiderueshme parash në euro, paund, dollarë, franga zviceriane,
si dhe 24 celularë.
Policia njofton se vijon puna për kapjen e 14 personave të shpallur në kërkim, ndërsa hetimet po vazhdojnë për identifikimin e çdo individi tjetër të përfshirë në këtë aktivitet kriminal.
