Daily Mail publikon rezultatet finale të Topit të Artë dhe konfirmon fituesin e këtij çmimi

Fituesi i Topit të Artë për vitin 2024 do të bëhet zyrtarisht i ditur sot (e hënë) në një ceremoni që do të mbahet në Paris.

Vetëm për herë të tretë që nga viti 2007, ky çmim nuk do t’i takojë ndonjërit prej Lionel Messi ose Cristiano Ronaldo, pasi dy legjendat nuk janë në mesin e të nominuarve këtë vit.

Sidoqoftë, mediumi anglez Daily Mail ka publikuar një listë e cila duket se tregon 12 lojtarët e renditur në bazë të pikëve të marrë, fotografi kjo që është bërë virale në rrjetet sociale.

Kjo listë e pakonfirmuar bën me dije se Vinicius Junior është fituesi i Topit të Artë me 630 pikë të grumbulluara, 54 më shumë se Rodri që pozicionohet në vendin e dytë.

Jude Bellingham është i treti, teksa dy yje të tjerë anglezë janë po ashtu në mesin e tetë më të mirëve – Harry Kane në të pestin dhe Phil Foden në të tetin.

Kylian Mbappe është në pozitën e katërt teksa Lamine Yamal në të shtatën. Emra të tjerë si Dani Olmo, Florian Wirtz, Dani Carvajal dhe Antonio Rudiger ndajnë pozitat nëntë, dhjetë, 11-të dhe 12-të respektivisht.

Sidoqoftë, befasia më e madhe duket të jetë fakti se Erling Haaland është vetëm i gjashti në listë me 195 pikë të grumbulluara.

Haaland i cili përfundoi i dyti pas Messit në vitin 2023, ka shënuar 38 gola në 45 ndeshje për Cityn sezonin e kaluar.

Lista e plotë e lojtarëve sipas pikëve të marra:

Vinicius Junior (Brazil, Real Madrid) – 630 pikë

Rodri (Spanjë, Man City) – 576 pikë

Jude Bellingham (Angli, Real Madrid) – 422 pikë

Kylian Mbappe (Francë, Real Madrid) – 317 pikë

Harry Kane (Angli, Bayern Munich) – 201 pikë

Erling Haaland (Norvegji, Man City) – 195 pikë

Lamine Yamal (Spanjë, Barcelona) – 128 pikë

Phil Foden (Angli, Man City) – 29 pikë

Dani Olmo (Spanjë, Barcelona) – 25 pikë

Florian Wirtz (Gjermani, Bayer Leverkusen) – 24 pikë

Dani Carvajal (Spanjë, Real Madrid) – 17 pikë

Antonio Rudiger (Gjermani, Real Madrid) – totali i pikëve nuk dihet

/Telegrafi/