Calhanoglu flet për ambiciet e këtij sezoni dhe rinovimin e kontratës me Interin

Mesfushori i Interit, Hakan Calhanoglu ka folur për ambiciet e tyre këtë sezon dhe dëshirën e tij për të lidhur një kontratë të re me klubin zikaltër.

Mesfushori 28-vjeçar turk iu bashkua Nerazzurrëve në një transferim të lirë vitin e kaluar pasi kontrata e tij skadoi me Milanin, duke i dhënë fund një periudhe katërvjeçare me kuqezinjtë.

Ai është bërë një pjesë e rëndësishme e skuadrës së Simone Inzaghit në Lombardi, duke shënuar tre gola dhe duke dhënë pesë asistime në 20 paraqitje në të gjitha garat këtë sezon.

Duke folur për Corriere della Sera, Calhanoglu fillimisht diskutoi se si ndihet në Inter dhe rëndësinë e përballjes së tyre të ardhshme me Napolin.

“Ndihem mirë dhe dua të jem edhe më i rëndësishëm për Interin. Këtu më ndihmuan që në fillim dhe më bënë të ndihem i qetë. Dua ta shpërblej këtë besim duke fituar një tjetër trofe, ndoshta Scudetton”, ka thënë fillimisht Calhanoglu.

“Ne besojmë në rikthimin, nëse rifillojmë me të njëjtën cilësi të ndeshjeve të fundit para pushimit, mund t’ia dalim. Ndeshja kundër Napolit më 4 janar në San Siro do të jetë vendimtare, do të na tregojë shumë për pjesën tjetër të sezonit”.

“Fitorja do të ishte shumë e rëndësishme, ne luajmë në shtëpi dhe jemi favoritë. Po përgatitemi në mënyrën e duhur, e shoh mirë ekipin. Duam të tregojmë atë që kemi brenda”.

#Calhanoglu: ‘Rispetto il #Milan, più cattivo all’#Inter. Moto vietata da #Ausilio, non mi ha chiamato per il rinnovo’ #calciomercato https://t.co/cb3M9MDaMZ

— calciomercato.com (@cmdotcom) December 22, 2022

Në fund, mesfushori turk foli edhe për rinovimin e kontratës, të cilin e do me çdo kusht.

“Drejtori sportiv ende nuk më ka thirrur për të negociuar rinovimin e kontratës sime, e cila skadon në vitin 2024”.

“Dua të flas për këtë, jam duke pritur që ai të më telefonojë. E dua Italinë, do të doja të qëndroja në Milan edhe në fund të karrierës sime”, përfundoi mesfushori. /Telegrafi/