Bytyqi: Miratimi i konceptdokumentit për AKA-në mundëson pavarësinë e plotë të funksionimit të saj

Ministri i Ministrisë së Arsimit Shkencës dhe Teknologjisë, Shyqiri Bytyqi, ka thënë se sot në mbledhjen e Qeverisë është miratuar konceptdokumentin për pavarësinë e plotë të funksionimit të Agjencisë së Kosovës për Akreditim.

Bytyqi në llogarinë e tij në Facebook, ka shkruar se MASHT-i do të jetë përgjegjës për krijimin e politikave në pavarësimin e plotë të funksionimit të Agjencionit Kosovar të Akreditimit dhe se sipas tij, do të kujdeset që kjo fushë të rregullohet në përputhje të plotë me standardet ndërkombëtare.

“Edhe një lajm i mirë në funksion të krijimit të kornizës ligjore specifike me qëllim që të sigurohet pavarësia e plotë e funksionimit të Agjencisë së Kosovës për Akreditim është miratimi sot në mbledhje të Qeverisë, i konceptdokumentit për AKA-në. Ministria e Arsimit, Shkencës dhe Teknologjisë duke pasur parasysh rëndësinë e këtij konceptdokumenti i cili është i përfshirë në planin e punës se MASHT për vitin 2019 dhe PSAK-un, e vlerëson si moment tejet pozitiv miratimin e këtij konceptdokumenti, që gjithashtu edhe programi i Qeverisë së Republikës së Kosovës, e trajton me prioritet të lartë. Ministria e Arsimit, Shkencës dhe Teknologjisë, do të jetë përgjegjëse për krijimin e politikave në pavarësimin e plotë të funksionimit të Agjencionit Kosovar të Akreditimi dhe do të kujdeset që kjo fushë të rregullohet në përputhje të plotë me standardet ndërkombëtare”, ka shkruar Bytyqi. /Telegrafi/