Buzhala: Furnizmimi stabil me rrymë, mbulohet nga importi

Zëdhënësi i KEDS-it, Viktor Buzhala në emisionin “Zyra e Ankesave”, në RTV Dukagjini ka arsyetuar mungesën e energjisë elektrike me punimet që janë duke u bërë në rrjetin elektrike.

Buzhala ka thënë se është duke u punuar në katër zona të Kosovës.

Ai tregoi se punimet në rrjet përfundojnë në fillim të javës së ardhshme.

“Jemi në finalizim të katër linjave të reja, këtë javë përkatësisht në fillim të javës të ardhshme do të përfundojnë këto punime. Për këtë arsye kërkojmë dhe mirëkuptimin e konsumatorëve sepse ka qenë një muaj relativisht i gjatë për ta, për shkak se nuk mund të punohet nën tension, pra po flasim për disa zona të caktuara siç është një pjesë e Skenderajt, një pjesë e Obiliqit-Prishtinës përkatësisht në zonën e fshatrave nga Mazgiti deri tek Besia, pastaj me Lipjan, Deçan dhe në Junik. D.m.th janë këto katër zona ku është punuar vazhdimisht. Edhe në Podujevë ka punime, mirëpo në këto pjesë po bëhen punime më intensive”, ka thënë Buzhala.

Ai po ashtu u shpreh se korporata nuk prodhon sasi të mjaftueshme të energjisë, mirëpo sipas tij kjo është kompensuar me anë të importit.

“Furnizimi është stabil, nuk ka ndërprerje të energjisë elektrike. Dihet që prodhimi nuk është në nivelin e duhur për shkak se nuk mbulon as 50 për qind të konsumit mirëpo, kjo është kompensuar me import”, theksoi zëdhënësi i KEDS-it, Viktor Buzhala. /Telegrafi/