Burri që pretendon se krijoi Bitcoinin, fiton procesin gjyqësor për kriptovalutat që kapin vlerën e 54 miliardë dollarëve

Eksperti i kompjuterëve Craig Wright, që pretendon se është ideatori dhe shpikësi i kriptovalutës Bitcoin, ka fituar gjyqin kundër kompanisë së ish-partnerit afarist që ka ndërruar jetë, që pretendonte se i ka borxh gjysmën e pasurisë që kap vlerën e mbi 50 miliardë dollarëve, shkruan The Guardian.

Vendimi i gjykatës nënkupton që Wright do të mbajë të gjitha 1.1 milion Bitcoin.

Kompania David Kleiman, e mikut të tij dhe dikur bashkëpunëtorit që ndërroi jetë në vitin 2013, pretendon që Wright dhe Kleiman së bashku kanë krijuar kriptovalutën e njohur, transmeton Telegrafi.

Edhe pse Wright ligjërisht nuk obligohet që ta ndajë me dikë pasurinë e Bitcoinit, gjykata megjithatë vendosi që ai duhet të paguaj 100 milionë dollarë dëmshpërblim për pronën intelektuale të papaguar të W&K Information Defense Research, që Kleiman dhe Wright e kishin themeluar.

Wright prej vitesh pretendon se është Satoshi Nakamoto, që ishte nofka e ideatorit të kriptovalutës më të popullarizuar në botë – Bitcoin.

Në gjykatë nuk është kërkuar dhe trajtuar çështja e identitetit të vërtetë të Satoshi Nakamotos, e të dyja palët pretendonin që Wright është apo pjesërisht “përgjegjës” për krijimin e bitcoin. Ai duhet të tregojë qasjen në portofolin digjital prej 1.1 milion Bitcoin që të dëshmojë se është vërtetë Nakamoto. /Telegrafi/