Burim Islami nga “Kodra Free Riders”: Duam që Kodrën e Diellit ta promovojmë edhe në botë, jo vetëm në rajon

Burim Islami nga iniciativa “Kodra Free Riders” është i ftuari i radhës në emisionin “PodGo” me të cilin kemi diskutuar për planet e tyre të ardhshme, Kodrën e Diellit, sportet dimërore, si dhe bashkëpunimin e tyre me pushtetin lokal dhe qendror.

Burimi tregoi se “Kodra Free Riders” ka nisur në vitin 2013 edhe atë në mënyrë interesante dhe të rastësishme, ndërsa tani janë një grup i madh i djemve dhe vajzave nga Tetova dhe qytetet tjera.

“Jemi djem dhe vajza të reja nga Tetova dhe nga qytetet tjera. Kemi nis në vitin 2013, kur rastësisht u takuam me pjesëtarët e ekipit në Kodrën e Diellit, pasi u rrëzova duke skijuar dhe humba celularin. Këtu është fillimi i gjithçkaje. Jemi takuar rastësisht në fillim dhe tani jemi një ekip i madh”.

“Qëllimet e Kodra Free Riders nuk ka fund. Për momentin qëllimi jonë është që Kodra e Diellit të ketë atë që e meriton. Duhet të bëhet teleferiku, pista të reja, ski-lifte tjerë. Pas realizimit të këtyre, nuk do të ndalemi së promovuari ski-qendrën. Do të mundohemi ta promovojmë botërisht, jo vetëm në regjion. Qëllime tjera kemi që ta promovojmë sportin në qytetin tonë, jo vetëm atë dimëror. Kemi plan që Kodra Free Riders të mos jetë i lokalizuar, por të zgjerohet edhe në shtete tjera”, tha Burimi duke përmendur planet për të ardhmen.

ndërsa i pyetur për bashkëpunimin e tyre me autoritetet e vendit, Burimi tha se më shumë janë përkrahur nga pushteti qendror se ai lokal.

“Mbështetja nga autoritetet është temë e ndjeshme pasi paragjykohemi. Deri tani më shumë kemi pasur mbështetjen e pushtetarëve qendror, se sa të atyre lokal. Kemi pasur dëshirë të takohemi me kryetarin e komunës Bilall Kasami, presim që shpejtë të realizohet. Ne nuk jemi organizatë partiake, nuk na intereson kush është në pushtet. Përpos pushtetit qendror, na ka ndihmuar Drejtoria e ski-qendrës”, tha Burimi.

Ai tha se kanë qenë në takim me zv.kryeministrin Izet Mexhiti, të cilit ia kanë prezantuar planet e tyre për të ardhmen. Burimi tha se kanë aplikuar me dy projekte në Ministrinë e Mjedisit Jetësor dhe Planifikimit Hapësinor dhe shpreson se do të pranohen, ndërsa për njërin tha se është promovimi i liqeneve që ndodhen në Malin Sharr./Telegrafi/