Boronica kultivohet në mënyrë të organizuar

Kultura e boronicës, e cila deri vonë është rritur vetvetiu nëpër male, tash ka filluar të kultivohet në mënyrë të organizuar dhe kultivuesit e saj nga viti në vit po i shtojnë sipërfaqet e mbjella. Kultivuesit e boronicës kanë treguar se kultivimi i saj është i lehtë dhe në vend ka kushte të mira për të dhe sipas tyre nuk mungon as leverdia në këtë veprimtari bujqësore.

Kultivuesi i Boronicës Flurim Shala nga Juniku, i cili merret me kultivimin e boronicës tash e tre vite, tregon se është i kënaqur me kultivimin e kësaj kulture bujqësore. “Në fillim të kësaj veprimtarie me ka përkrahur me fidane programi Mundësi të Reja për Bujqësi i USAID-it, po ashtu me kanë përkrah edhe me këshilla çka jam falënderues”, thotë Shala.

Ai tregon se me frutat e boronicës së tij tashmë ka dal në tregun vendor. “Po kam filluar të dal në treg me boronicën dhe jam i kënaqur me shitjet dhe kultivimin e saj, por bujqve u duhet një përkrahje më e madhe. Shitjen e kam nëpër tregje dhe markete të ndryshme në komunat e Rrafshit të Dukagjinit dhe komuna të tjera”, tregon fermeri Shala.

Ai thotë se fermerët janë duke pritur Qeverinë Kosovës respektivisht Ministrinë e Bujqësisë që t’u ndajnë mjetet e premtuara nga subvencionet dhe grantet.

Zyrtarët e Komunës së Junikut kanë treguar se kultura e boronicës kultivohet edhe në ketë komunë, pasi që po tregohet e suksesshme.

“Në Komunën e Junikut janë të mbjella 2 hektarë me boronicë. Presim që viteve të ardhshme këto sipërfaqe të rriten edhe më shume pasi që ka leverdi edhe nga kultivimi i kësaj kulture bujqësore”, ka thënë Ali Gacaferi këshilltar komunal për bujqësi në Junik.

Kultivimi i boronicës është në sipërfaqe prej 10 hektarëve, derisa komunat në të cilat kultivohen janë kryesisht komunat e rrafshit të Dukagjinit si Deçani, Juniku, Gjakova por edhe në Shtërpcë e Gjilan. E varietetet e boronicës të cilat kultivohen në Kosovë, janë: Bluecrop, duke, elliot, legacy, toro, sierra, nelson, arlen si dhe chanticler.

Ndërkaq zyrtarët e Ministrisë së Bujqësisë Pylltarisë dhe Zhvillimit Rural (MBPZHR), kanë thënë sikur çdo vit edhe këtë vit do të përkrahen kultivuesit e bimëve të imta. Sipas tyre, të gjithë fermerët të cilët kanë një hektar tokë të punuar do të përkrahen me nga 300 euro. /FermaIme/Telegrafi/