Bordi Drejtues i M-NAV i dorëzohet presionit publik – tetë kandidatët për kontrollorë të trafikut ajror do të fillojnë shkollimin në Danimarkë

Tetë kandidatët për kontrollues të trafikut ajror do të fillojnë trajnimin e tyre në Danimarkë. Bordi drejtues gjatë ditës do të nënshkruajë dokumentet e nevojshme, por para kësaj do të mbahet intervistë me të gjithë.

Procedura duhet të përfundojë sot, ndërsa autoritetet në Danimarkë tashmë po diskutojnë datën në të cilën duhet të fillojnë ligjëratat nga pjesa teorike, e cila, sipas njoftimit të qendrës së trajnimit danez, duhet të organizohet në Shkup, përcjell Telegrafi Maqedoni nga Sitel.

Vendimi i bordit drejtues për përfundimin e konkursit për përzgjedhjen e 8 kandidatëve për kontrollorë të trafikut ajror, vjen pas reagimeve të punonjësve të kontrollit ajror, Shoqatës së Kontrollorëve të Trafikut Ajror dhe sindikatës. Ata akuzuan se tre anëtarët e bordit drejtues të M-NAV-së po tentojnë ta anulojnë konkursin, pasi në mesin e kandidatëve të përzgjedhur nuk ka pasur të afërm të anëtarëve të BDI-së.

Nëse kjo ndodh, sipas kryetares së Shoqatës së kontrollorëve të trafikut ajror Natasha Mijat Kostovska, kulla e kontrollit mund të mbyllet për dy vjet, sepse nuk do të ketë kush të punojë në të.

Edhe qeveria i bëri thirrje M-NAV që të respektojë standardet evropiane për përzgjedhjen e kandidatëve për kontrollin e trafikut ajror.

Zëvendëskryeministrja Sllavica Grkovska, nga ana tjetër, kërkoi përgjegjësi nga bordi drejtues. Ajo në statusin e saj në Facebook ka shkruar se anëtarët e Bordit Drejtues të M-NAV duhet të përgjigjen nëse po e rrezikojnë konkurrencën e kontrollorëve në dëm të personelit cilësor dhe në dëm të sigurisë së të gjithë qytetarëve.

Dje dhe sot mbi 30 punonjës të M-NAV-së kanë dorëzuar dorëheqjet e tyre, zëvendësdrejtorë, shefa, instruktorë, ekspertë, udhëheqës të departamenteve, por ata kanë thënë se do t’i tërheqin vetëm nëse drejtorët i dërgojnë të tetë të përzgjedhurit në trajnimin e nevojshëm./Telegrafi/