Bonucci kapiten te Milani edhe jashtë fushës – Pas paraqitjes së jashtëzakonshme e detyron Cutronen të paguajë darkë për të gjithë skuadrën (Foto)

Ai erdhi me shumë bujë në këtë afat kalimtar verorë nga radhët e Juventusit, e menjëherë iu garantua shiriti i kapitenit në fushën e blertë.

Megjithatë Bonucci duket se nuk udhëheq vetëm në fushë, por edhe jashtë saj.

Mbrëmjen e djeshme (e diel), Milani mposhti 3-0 Crotonen në ndeshjen e parë të sezonit të ri në Serie A, ku spikati padyshim talenti i ri në sulm, Patrick Cutrone, autor i një goli, i rrëmbimit të penalltisë së shënuar nga Kessie dhe i një asisti për Suson.

E për ta festuar këtë debutim tejet fantastik të talentit të dalë nga akademia e Milanit, nuk mund të kishte më mirë sesa t’iu ofronte shokëve të skuadrës një darkë.

Sigurisht të paguar prej tij, por kjo jo për rrjedhë logjike, por sepse kështu e vendosi kapiten Bonucci.

“Njëri pas tjetrit (golat). Një fillim tejet i mirë, ashtu siç e prisnim të gjithë. Për këtë arsye duhet të punojmë fort, ditë pas dite. Bravo Patrick Cutrone për golin tënd të parë në Serie A”, ishte urimi i Leonardo Bonuccit për sulmuesin e ri, transmeton Top Channel.

https://www.instagram.com/p/BYB-_iOF_7B/?taken-by=bonuccileo19

Por urimi nuk mbeti me kaq.

“Siç e do tradita, të presim për darkën…për ta paguar sigurisht!”, shkroi ish-mbrojtësi i Juventusit në rrjetin social.

Një ftesë e aprovuar nga të gjithë shokët e skuadrës, pas së cilës erdhi edhe reagimi i vet Cutrones. “Faleminderit Leo, ashtu do të jetë”.

Një Milan që, përveç demonstrimit të vlerave në fushën e blertë, duket se po shfaqet edhe nëpër rrjetet sociale për të dhënë mesazhin se janë një grup i bashkuar dhe tejet i motivuar për suksese në këtë sezon të ri.