Bilall Kasami pret ambasadoren e OSBE, Nina Suomalainen

Sot kryetari i Lëvizjes BESA, Bilall Kasami, e ka pritur në një takim në selinë e Lëvizjes Ambasadoren e OSBE në Shkup, Nina Suomalainen, transmeton Telegrafi Maqedoni.

Në këtë takim kryesisht është biseduar për temat aktuale politike dhe për mundësitë e daljes nga kriza e thellë politike, në të cilën gjendet vendi, me ç’rast BESA e ka ripërsëritur qëndrimin e saj se, pa u pastruar listat zgjedhore dhe pa u pavarësuar mediat, nuk ka mundësi të shkohet në zgjedhje të parakohshme. Kryetari Kasami theksoi se një mundësi për dalje nga kjo krizë politike është platforma “Ridefinimi”, ku janë paraparë në detaje zgjidhjet e problemeve mes dy komuniteteve më të mëdha në vend në plan më afatgjatë, njoftojnë nga kjo Lëvizje.

Po ashtu përfaqësuesit e Lëvizjes BESA kanë falënderuar rolin e faktorit ndërkombëtar, ku bën pjesë edhe OSBE, që ka kontribuar në vazhdimësi që kriza mos të përshkallëzohet në përmasa dramatike.

Në fund të takimit të dy palët janë pajtuar që takimet e këtilla në frymë miqësore duhet të vazhdojnë edhe në të ardhmen./Telegrafi/