Biden nuk do të zbatojë ligjin për ndalimin e TikTok-ut, fati i aplikacionit mbetet në duart e Trumpit

Presidenti në largim i SHBA-së, Joe Biden prillin e kaluar nënshkroi një ligj që kërkonte që ByteDance të shesë asetet në SHBA deri më 19 janar ose do të përballet me një ndalim mbarëkombëtar.

Por, bëhet e ditur se Biden nuk do të zbatojë një ndalim të aplikacionit TikTok që do të hyjë në fuqi një ditë para se të largohet nga detyra.

Në vend të kësaj, ai do ta lë fatin e aplikacionit në duart e presidentit të sapozgjedhur Donald Trump.

Trump, i cili dikur bëri thirrje për të ndaluar aplikacionin, së fundmi është zotuar ta mbajë atë të disponueshëm në SHBA, megjithëse ekipi i tij i tranzicionit nuk ka thënë se si synojnë ta arrijnë këtë, shkruan euronews, përcjell Telegrafi.

Ndërkohë, shefi ekzekutiv i TikTok, Shou Zi Chew pritet të marrë pjesë në inaugurimin e Trumpit, pasi këshilltari i presidentit të zgjedhur për sigurinë kombëtare sinjalizon se administrata e ardhshme mund të ndërmarrë hapa për të “shpëtuar” aplikacionin.

Mike Waltz tha se ligji federal që mund të ndalojë TikTok gjithashtu “lejon një zgjatje për sa kohë që një marrëveshje e qëndrueshme është në tryezë”.

Demokratët ishin përpjekur të miratonin legjislacionin që do të kishte zgjatur afatin, por senatori republikan Tom Cotton i Arkansas e bllokoi atë.

Sipas Cotton, kryetar i Komitetit të Inteligjencës së Senatit, TikTok ka pasur kohë të mjaftueshme për të gjetur një pronar të ri.

“TikTok është një aplikacion spiun komunist kinez që i shkatërron fëmijët tanë, mbledh të dhënat e tyre, i synon ata me përmbajtje të dëmshme dhe manipuluese dhe përhap propagandë komuniste”, deklaroi Cotton.

Ndryshe, Trump ka ndryshuar pozicionin e tij ndaj aplikacionit popullor, pasi është përpjekur ta ndalojë atë gjatë mandatit të tij të parë në detyrë për shqetësime të sigurisë kombëtare. /Telegrafi/