Besimtarët në Maqedoni vizituan kishat në qytetet ku nuk ka orë policore

Në të gjitha qytetet e vendit, si në ato ku është në fuqi ora policore ashtu dhe në qytetet ku deri në ora 16:00 qytetarët kanë qenë të lirë, pjesëtarë të policisë kanë dalë në rrugët kryesore për të parandaluar vizitën në varreza dhe kryerjen e riteve fetare për Ditën e Shpirtërave, të cilën e shënojnë sot besimtarët ortodoks. Në qytetet që nuk kanë qenë në izolim të plotë 80 orësh, e kryesisht në Veles dhe Manastir, policia ka bllokuar edhe rrugët që çojnë drejt varrezave për të parandaluar vizitat e qytetarëve atje.

Por shumë besimtarë ortodoks, e në veçanti pas thirrjeve të klerikëve fetarë, këtë ditë e kanë shënuar në kisha. Në Veles dhe Manastir raportohet se kishat kanë qëndruar të hapura që aty të kryhen ritet të cilat tradicionalisht kryhen në varreza. Drejtuesit e tempujve fetarë kanë thënë se kanë angazhuar persona për ruajtjen e rendit, është mbajtur distanca dhe besimtarët kanë mbajtur edhe maska.

Lutjet në kisha janë kryer pas thirjes së drejtuesve fetar lokal. Dje në mitropoliti Agatangell nga Dioqeza e Vardarit bëri thirrje që besimtarët nga kishat e Velesit, Kavadarit, Negotinës dhe Gjevgjelisë t’i vizitojnë masivisht kishat gjatë festave.

Por edhe përkundër deklarimeve se respektohen masat mbrojtëse, kjo veprime janë vepruar si shkelje ligjore dhe ka ngritur alarmin e institucioneve për shkak të rrezikut nga shpërndarja e pandemisë. Prokuroria Themelore Publike Veles hapi lëndë pas këtyre thirjeve, që erdhën përderisa në fuqi është ndalesa për grupim në territorin e gjithë shtetit, ndalesa për lëvizje të popullatës në periudha të caktuara kohore dhe ndalesa për të vizituar varrezat.

Me qëllim verifikimin e fakteve në këtë lëndë dhe përgjegjësisë eventuale penale, kumtoi sot Prokuroria Publike e Republikës së Maqedonisë së Veriut, prokuroria e Velesit i dha udhëzime SPB Veles për sigurimin e të dhënave sa i përket veprës së kryer penale dhe hetimit të rrethanave se përmban tipare të veprës penale, si dhe në pikëpamje të respektimit të masave të cilat janë përcaktuar nga ana e Qeverisë së Republikës së Maqedonisë së Veriut.

Edhe ministri i shëndetësisë, ka thënë dje se thirrja e kreut të Kishës Ortodokse për të vizituar masivisht kishat gjatë festës fetare është në kundërshtim me gjithçka që po e bëjnë autoritetet në parandalimin e pandemisë. Ai kërkoi nga Agatangell ta heq thirrjen e tij që të mos rrezikohet shëndeti i qytetarëve./Shenja/