Berisha komenton deklaratën e Ramës në Forumin e Bledit: E pacipë dhe e turpshme!

Kryetari i Partisë Demokratike, Sali Berisha, e ka cilësuar kryeministrin Rama si një të pacipë, lidhur me deklaratën që mbajti në Samitin e Bled-it në Slloveni.

Berisha shkruan me anë të një postimi në rrjetet sociale se Rama deklaroi në Slloveni, në Forumin e Bled-it se nëse merret për bazë lufta për anëtarësimin e Ukrainës në BE, vendet e Ballkanit janë gati të sulmojnë njëri-tjetrin.

Për Berishën, kjo është një deklaratë e pacipë dhe e turpshme. Kryeministri Edi Rama, përcolli mesazhin që BE-ja nuk duhet të anëtarësojë Ukrainën dhe të lërë pas Ballkanin Perëndimor.

“Një hokatar i pacipë dhe i pakripë! Të dashur miq, Në pozitën e një hokatari të pacipë dhe të pakripë Edi Rama, për të shprehur pakënaqësinë e tij, për qëndrimin e ftohtë të BE-së ndaj Shqipërisë deklaroi në Slloveni, në Forumin e Bledit se: Nëse merret për bazë lufta për anëtarësimin e Ukrainës në BE, vendet e Ballkanit janë gati të sulmojnë njëri-tjetrin.

Kjo është një deklaratë e pacipë, e turpshme. Ukrainasit kanë firmosur statusin e kandidatit të vendit të tyre në BE me gjakun, heroizmin, sakrificat e luftën dhe rezistencën e jashtëzakonshme, martirizimin e qindëra mijëra bijve dhe bijave të tyre, për lirinë dhe sovranitetin e vendit të tyre nga agresori barbar rus, por edhe mbrojtjen i lirisë dhe sovranitetit e mbarë kombeve të lira të Europës.

Kurse Edi Rama ka vendosur në Shqipëri regjimin e narkoshtetin e parë dhe të vetëm në Europë, të bazuar në krimin e organizuar, drogën, korrupsionin e qeveritarëve shqiptarë me të cilin ka detyruar shqiptarët të largohen nga Shqipëria më shumë sesa janë larguar ukrainasit nga bombardimet ruse të fshatrave dhe qyteteve të vendi të tyre. Për shqiptaret është turp që përfaqësohen nga Edi Rama!”, ka shkruar Berisha.