Ministri i Inovacionit dhe Ndërmarrësisë, Besim Beqaj, sot ka dorëzuar dorëheqjen e tij tek kryeministri i vendit, Ramush Haradinaj.

Kështu bëri të ditur vetë ministri Beqaj në një konferencë për media, ku tha se është plotësisht i bindur në pafajësinë e tij.

Beqaj shtoi tha se drejtësia do ta vërtetoj pafajësinë e tij duke u bazuar në prova dhe fakte dhe shtoi se vepra për të cilën akuzohet nuk është vepër korruptive.

“Në mëngjes kam paraqitur dorëheqjen time tek kryeministri, Ramush Haradinaj. Konsideroj që ky është angazhim i përbashkët i të gjitha strukturave udhëheqëse ku jam edhe vet në PDK. Jam plotësisht i bindur që këto aktakuza janë të paargumentuara. Besoj që drejtësia do ta vërtetoj pafajësinë time duke u u bazuar në prova dhe fakte. Vepra që po akuzohem nuk ka asnjë nivel të korrupsionit. Për detaje do të flasim në gjykatë…”, ka thënë Beqaj.

Po ashtu, ai tha se do të vazhdojë të jetë pjesë e Partisë Demokratike të Kosovës (PDK).

“Në PDK janë marr vendime që duhet të jetësohen deri në fund. Do të vazhdoj që të jem pjesë e PDK-së. Vepra që unë akuzohem nuk është vepër korruptive. Ligjet janë elementet bazike për ndarjen e drejtësisë”, tha ai.

Veseli liron nga detyra të gjithë zyrtarët e PDK-së me aktakuza (Video) Veseli liron nga detyra të gjithë zyrtarët e PDK-së me aktakuza (Video)

Ndryshe, të mërkurën kryetari i PDK-së, Kadri Veseli ka larguar nga të gjitha pozitat partiake dhe institucionale të gjithë zyrtarët e PDK-së që kanë aktakuza të konfirmuara nga institucionet e drejtësisë.

Fjalimi i plotë i ministrit Besim Beqaj në konferencën për media

Si rezultat i diskutimeve të përbashkëta në lidhje me veprimet që duhet ndërmarrë për të argumentuar vizionin e Partisë Demokratike të Kosovës, ju kam ftuar të ju njoftoj se sot në mëngjes kam paraqitur dorëheqjen time tek Kryeministri i Qeverisë.

Fillimisht dëshiroj të reflektoj shkurtimisht në lidhje me Vendimin e Partisë Demokratike të Kosovës. Konsideroj që ky është angazhim i përbashkët i të gjithë strukturave udhëheqëse të PDK-së, pjesë e së cilës jam edhe vetë, që të eliminohen paragjykimet dhe akuzat me pretendime, në lidhje me proceset gjyqësore të zyrtarëve të PDK-së.

Në rastin tim, unë jam plotësisht i bindur se këto akuza janë të pa bazuara në fakte dhe argumente ligjore dhe që drejtësia do ta vërtetoj këtë. Është parim bazë i drejtësisë që çdo kush është i pafajshëm përderisa të mos provohet e kundërta, e ftoj secilin që ta respektoj këtë parim. Unë besoj që drejtësia do ta vërtetojë pafajësinë time duke u bazuar në prova dhe fakte të argumentuara.

Vepra për të cilën gjykohem-“Shkelja e statusit të barabartë të shtetasve dhe banorëve të Republikës së Kosovës”, nuk ka asnjë element të veprës së korrupsionit. Ashtu siç e ka vërejtur edhe publiku i gjerë, aktakuza për të cilën unë përballem ka një mal të metash dhe që në fillim është aplikuar drejtësi selektive.  Për detajet do të flasim në Gjykatë dhe ju ftoj ta përcjellni me vëmendje të plotë këtë proces dhe mund ta siguroj secilin se në rast të një procesi të drejtë gjyqësor, objektiv, të paanshëm, unë do të lirohem nga aktakuza. Andaj, ky nuk është vendi ku duhet te diskutojmë për përmbajtjen e aktakuzës, por vetëm në Gjykatë.

Gjatë angazhimit tim publik dhe privat jam udhëhequr nga dy parime themelore, zbatimi i ligjeve dhe profesionalizimit.

Jam shumë krenar për projektet e mëdha të cilat i kam realizuar: përafrimi i agjendës me BE-në, jetësimi i prioriteteve për zhvillim ekonomik duke u mbështetur në stabilitetin makro fiskal, si dhe duke vendosur në qendër të vëmendjes së politikë-bërjes inovacionin dhe ndërmarrësinë – për të krijuar vende të reja të punës për të rinjtë tonë.

Gjatë mandatit tim në Ministrinë e Inovacionit dhe Ndërmarrësisë, kam arritur të themeloj dhe funksionalizoj një institucion i cili mbetet i hapur për bashkëpunim ndërkombëtarë me partnerët tonë, si dhe bashkëpunim vendor me sektorin privat, shoqërinë civile dhe mediat. Kemi arritur të (1) hartojmë legjislacion dhe politika strategjike për të vendosur në pah inovacionin dhe ndërmarrësinë; (2) ndërtojmë infrastrukturën e nevojshme ku ndërmarrësit e rinj mund ta jetësojnë ëndrrën e tyre për ndërmarrësi dhe inovacion; 3) krijojmë instrumentet financiare përmes fondit të inovacionit, i cili ka përkrahur shumë të rinjtë dhe të reja.

Ju siguroj të gjithëve, që kjo sfidë do të kalohet shumë shpejtë dhe të dal e vërteta e pakontestueshme.

I bindur që ky proces së shpejti do të marrë një epilog dhe për secilën akuzë do të faktohet së unë nuk kam bërë shkelje të ligjit.

Për fund, dua të falënderoj të gjithë bashkëpunëtorët brenda dhe jashtë Institucioneve që kam udhëhequr, në veçanti juve përfaqësues të mediave për bashkëpunimin e gjatë dhe të suksesshëm që kemi pasur. /Telegrafi/