Në mesin e shumë talenteve që po përfaqësojnë Kosovën në Kampionatin Evropian për grupmoshën U16 (Divizioni B), që po zhvillohet në Shkup, spikat një emër që po tërheq vëmendjen e ekspertëve të basketbollit evropian: Diar Libusha. Ky djalosh 15-vjeçar nga Peja, me një gjatësi mbresëlënëse prej 2.02 metra, konsiderohet si një nga asetet më premtuese të gjeneratës së re.
Libusha luan në pozitat 3 dhe 4, duke demonstruar një kombinim të rrallë mes prezencës fizike nën kosh dhe lëvizshmërisë në krah. Në debutimin e tij në Evropian, përballë Holandës, ai u dallua si një nga lojtarët më efikas të Kosovës, duke shënuar 9 pikë për vetëm 18 minuta në parket.
Performanca e tij u plotësua me duele të fituara në mbrojtje, bllokime të sakta dhe një aftësi të jashtëzakonshme për të lexuar aksionet në kohë reale – cilësi që çdo trajner i vlerëson lart.
Gjatë sezonit të fundit me klubin pejan KB Borea, Libusha ka qenë shembull i përkushtimit dhe profesionalizmit. Ai ka luajtur paralelisht për ekipet U16, U18 dhe seniorët, duke realizuar një mesatare prej rreth 20 pikësh për ndeshje në kampionatin e rregullt. Me skuadrën U16 arriti deri në finalen e kampionatit kombëtar, ku ishte një nga lojtarët kyç në rrugëtimin drejt vendit të dytë.
Diar është i vetmi basketbollist i gjeneratave të reja nga Peja që ka marrë ftesë nga të dy përfaqësueset U16 dhe U18 për vitin 2025. Karrierën e ka nisur që në moshë të vogël, vetëm 6 vjeç, në klubet e basketbollit të qytetit të tij, ndërsa prej moshës 12-vjeçare është pjesë e KB Borea, duke kaluar nëpër të gjitha kategoritë dhe fituar eksperiencë të vlefshme me ekipin e parë.
Në Shkup, paraqitjet e tij po ndiqen nga afër nga skautë ndërkombëtarë që janë në kërkim të yjeve të së ardhmes. Kosova ndodhet në një grup të vështirë me Kroacinë, Ukrainën, Holandën, Danimarkën dhe Islandën, mirëpo qëllimi është një paraqitje dinjitoze – dhe lojtarë si Diar Libusha janë dëshmi se basketbolli kosovar është në rrugë të mbarë për të ndërtuar një të ardhme të ndritur në arenën evropiane.
