Bashkim Smakaj paraqitet para trupit gjykues, avokati kërkon lirimin me kusht – kundërshton masën e paraburgimit

Ish-kryeshefi i Agjencisë Kosovare të Inteligjencës (AKI), Bashkim Smakaj është paraqitur sot për herë të parë para trupit gjykues në Hagë, pas ngritjes së aktakuzës ndaj tij më 29 nëntor 2024.

Smakaj akuzohet për tentativë për pengim të personave zyrtar, veçanërisht prokurorë dhe hetuesit e ZPS-së në kryerjen e detyrave zyrtare me anë të pjesëmarrjes në veprim të përbashkët të një grupi dhe mosbindje ndaj gjykatës.

Sipas aktakuzës thuhet se këto vepra penale u kryen në mes 9 shtatorit dhe 30 tetorit 2023.

Sekretarja e ZPS-së u shpreh se “ekziston dyshimi i  bazuar mirë se Smakaj mban përgjegjësi penale për kryerjen e veprës penale të tentativës së pengimit të peronave zyrtarë në kryerjen e detyrës zyrtare sipas pikës 12 të aktakuzës,  ndihmë dhënë z.Thaçi në kontekst të grupit në kryerjen e veprës penale të tentativës së pengimit të personave zyrtarë, ndihmë z.Thaçi për mosbindjen ndaj gjykatës, dhe marrëveshje me Thaçin në kontekst të grupit”.

Pas kësaj Bashkim Smakaj kërkoi që të konsultohet paraprakisht me avokatin e tij Bas Martenes, si rrjedhojë seanca shkoi në pushim për dhjetë minuta.

Me tu rikthyer në seancë, Smakaj u shpreh se për tu deklaruar rreth akuzave do të “vendos të shfrytëzoj periudhën kohore prej 30 ditësh që ti marr edhe materialet shtesë”

Avokati Bas Martenes lidhur me masën e paraburgimit tha e se e kundërshton këtë.

“Klienti im është privuar nga liria dhe kjo është e përcaktuar edhe me ligj. Unë e kundërshtoj ligjshmërinë e arrestimit dhe paraburgimit të klientit tim. Në të njëjtën lëndë gjyqësore është edhe një person që nuk është në paraburgim dhe është ftuar të paraqitet vetë me vullnetin e tij të lirë para këtij trupi gjykues. Pyetja ime është përse nuk mund të ndodhte e njëjta gjë edhe me klientin tim?”, ka thënë Martenes.

Martenes shtoi se Smakaj  u arrestua në mënyrë të befasishme pa e ditur, dhe kjo është e pajustifikueshme.

“Mbrojtja kërkon lirimin e klientit, nuk është e nevojshme ta mbani në paraburgim. Gjithashtu kemi kërkesë edhe për lirimin me kusht. Ai është i gatshëm të ofroj 5 mijë euro si garanci, të dorëzoj pasaportën e tij në Kosovë, t’i raportojë EULEX-it sipas rregullave që keni ju dhe të plotësoj të gjitha kushtetet e tjera. Pra kërkojmë lirimin me kusht”, tha Martenes.

Ndryshe, Bashkim Smakaj, Fadil Fazliu dhe Isni Kilaj u arrestuan më 5 dhjetor në Kosovë dhe u transferuan në objektin e paraburgimit në DhSK të premten më 6 dhjetor në bazë të aktakuzës së konfirmuar dhe fletarrestimeve të lëshuara nga Haga.

Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.

Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë e cila pritet të mbahet të hënën me 9 nëntor. /Telegrafi/