Basha: Opozita nuk do të tërhiqet nga kërkesa për qeveri teknike

Kryetari i Partisë Demokratike, Lulzim Basha, të martën ka bërë edhe një herë të qartë se opozita nuk do të tërhiqet nga kërkesa për një qeveri teknike me vullnet të gjerë politik për të garantuar zgjedhje të lira dhe të ndershme.

Ai këto komente i bëri pas takimit që kishte në Tiranë me ambasadorët e vendeve të Bashkimit Evropian me të cilët bisedoi për gjendjen politike në vend.

“Bashkë me përfaqësuesit e tjerë të koalicionit opozitar, bëmë të qartë vendimin tonë për të mos u tërhequr nga beteja qytetare, nga beteja popullore për zgjedhje të lira dhe të ndershme, deri në realizimin e kushtit të vetëm të opozitës që është një qeveri teknike me vullnet të gjerë politik për të garantuar zgjedhje të lira dhe të ndershme”, ka thënë Basha.

Për më tepër, ai ka theksuar se pas këtij takimi opozita është edhe më shumë optimiste dhe e vendosur për t’i shkuar deri në fund kauzës së tyre.

“Unë dhe besoj edhe kryetarët e partive të tjera të koalicionit, ndahemi edhe nga kjo drekë me shumë optimizëm dhe akoma me më shumë vendosmëri për t’i shkuar deri në fund kauzës tonë”, është shprehur Basha.