Edhe pse Barcelona e ka mbyllur punën e saj në afatin kalimtar të verës, në “Camp Nou” sytë janë kthyer nga një ish-lojtar i tyre.
Mikayil Faye, mbrojtësi i ri senegalez që u largua nga Barça një vit më parë, është huazuar këtë sezon te skuadra e Serie A, Cremonese, raporton AS.
Një transferim që nuk shkoi sipas planeve
Huazimi te Cremonese përfshin një klauzolë blerjeje prej 10 milionë eurosh – shumë që nuk e entuziazmon aspak Barcelonën.
Arsyeja është e thjeshtë: kur Faye kaloi nga Barcelona te Rennes, katalanasit fituan 10.3 milionë euro, por ruajtën 30% të një shitjeje të ardhshme dhe opsionin për ta rikthyer për dyfishin e kësaj shume.
Megjithatë, performanca e dobët e tij në Francë prishi llogaritë e klubit spanjoll. Barça shpresonte që mbrojtësi të shpërthente dhe të sillte të ardhura të konsiderueshme nga një transferim tjetër, por realiteti doli ndryshe.
Nga premtimi te stoli
Në sezonin e kaluar, Faye pati hapësira në gjysmën e parë nën drejtimin e Jorge Sampaolit. Por pas ndryshimit të trajnerit dhe ardhjes së Habib Beye, ai humbi totalisht besimin.
Në gjithë vitin 2025 u aktivizua vetëm në tre ndeshje, ndërsa trajneri i ri nuk ngurroi ta kritikonte publikisht për mungesë dinamizmi dhe përqendrimi në stërvitje.
Një shans i ri në Itali
Huazimi te Cremonese përfaqëson një mundësi të re për mbrojtësin 20-vjeçar. Grigiorossët, që janë rikthyer në elitën italiane pas dy sezonesh, e kanë nisur kampionatin me dy fitore radhazi dhe synojnë të sigurojnë mbijetesën sa më herët.
Faye do të jetë pjesë e një skuadre me emra me përvojë si Jamie Vardy dhe Antonio Sanabria, ku mund të ketë hapësirë më të madhe për të treguar vlerat e tij.
Dilema e Barcelonës
Për Barcelonën, situata është kontradiktore: ata duan që Faye të zhvillohet dhe të rrisë vlerën e tij në treg, por njëkohësisht shpresojnë që Cremonese të mos e aktivizojë klauzolën prej 10 milionë eurosh.
Arsyeja është e qartë – një transferim i ardhshëm i tij drejt një klubi më të madh do t’i sillte Barçës një fitim shumë më të madh sesa kjo shumë fikse. /Telegrafi/
