Banorët e fshatit Dumnicë të Podujevës mbesin pa transport publik, Komuna tregon se ku qëndron problemi

Banorët e fshatit Dumnicë në komunën e Podujevës, po përballen prej muajsh me mungesën e transportit publik, një situatë që ka krijuar vështirësi të mëdha për ata që udhëtojnë për në qytet apo destinacione të tjera.

Banorët e kësaj zone kanë raportuar në Telegrafi për këtë problem, duke thënë se që nga muaji qershor linja e transportit publik ka ndalur së funksionuari.

Në lidhje me këtë problem, Telegrafi ka kontaktuar Komunën e Podujevës, të cilët kanë ofruar shpjegime për situatën dhe kanë sqaruar arsyet e mungesës së transportit.

“Lidhur me pyetjen rreth mungesës së transportit publik në fshatin Dumnicë, ju njoftojmë se operatori ekonomik i cili e ka pasur atë linjë të transportit e ka ndalë punën me arsyetimin se nuk ka udhëtarë mjaftueshëm dhe nuk ka llogari financiare ta mbajë atë linjë. Kemi qenë të përkushtuar si administratë komunale që të gjejmë një zgjidhje, por ka qenë e pamundur pasi as operatorët tjerë nuk kanë pranuar ta marrin atë linjë të transportit”, thuhet në përgjigjen e tyre.

Për të zgjidhur këtë situatë, Komuna e Podujevës njofton se në muajin janar do të bëhet shpallja publike për dhënien e lejeve qarkulluese të transportit dhe atëherë do të shpallen të lira edhe linjat ku nuk ka aktualisht transport dhe me këtë rast edhe për linjën Podujevë-Dumnicë dhe anasjelltas./Telegrafi/